Keńes ókimetimen birge kelmeske ketip, shejirege qosylǵan oqıǵalardyń biri – Shopandar toıy. Dýmanǵa toly sol dáýrendi kúnderden qalǵan estelikterdiń biri – qyzylordalyq kásipqoı fototilshiniń myna bir sátti sýreti. Eń qymbat, eń jedel fotokameralarmen de ýysyńda ustaı almaıtyn sátti jibermegen Bolat Omarálıev aǵamyz bul fotony bylaı sóıletedi.
– Baıyrǵyda Qyzylorda oblysy, Syrdarııa aýdanynyń qoıshylarynyń jaıylymdary Jezqazǵan óńirindegi Ulytaýmen, odan keıin Ońtústik Qazaqstan oblysynyń Sozaq aýdandarymen shektesip jatýshy edi. Syrdarııa aýdany Sarysýdaǵy mal jaıylymynan erte kóktemde jaılaýǵa shyǵyp, qoıdy tóldetip, kúzge qaraı semirtip, qystaýǵa Syrǵa qaıta qulaıdy. Osy úrdis 1960 jyldan bastap 1990 jyldarǵa deıin jalǵasty. Sol zamanda mamyr aıynyń aıaǵyna taman qoı tóldep bolǵasyn, úsh kún qatarynan shopandar toıy ótedi. Malshylar da osy kezde bir sergip qalýshy edi.
Quda kelgendeı qyzyqty dýmannyń alǵashqy kúni ozat shopandar marapattalady. Ekinshi kúni at báıgesi bolady. Ol kezde shopandar toıynan basqa jerde at báıgesi ótpeıtin. Gazet tapsyrmasymen osyndaı báıgeniń talaıyna qatystym.
Shamamen 1975 jyly bolýy kerek, aýdandyq gazet redaktory, aqyn Mahmutbaı Ámireev ekeýmiz issaparǵa shyqtyq. Mahań meniń bastyǵym, men sol aýdandyq gazette fototilshimin.
Shopandar toıy Jezqazǵan óńirimen shekaralas «Qyzdyń shubary» degen jerde Sarysý ózeniniń boıynda jylda ótedi.
Mahań ekeýmiz toıdan bir kún buryn erterek kelip, bir qoıshynyń úıinde demalyp jatsaq, tań aldynda qoıshynyń qyzy ıinaǵashpen sý alyp kele jatyr eken. Sırek kóriniske tańdana qarap, úıdegi fotokameraǵa qaraı júgirdim. Fotoapparatymdy alyp jetem degenshe, bir attyly jas jigit te atynan túsip qyzdyń sheleginen sý ishe bergende áreń úlgirdim. Sýretti túsirip bolyp artyma qarasam, Mahań syrtymyzdan baqylap tur eken. Eki kózinde jas. Osy kóriniske qatty tolqyǵan-aý, shamasy, meni bas salyp qushaqtap aldy, deıdi óz isiniń has sheberi.
Aınash ESALI, «Egemen Qazaqstan»
ALMATY