Atyraýda marafon jarysy jıi uıymdastyrylady. Buqaralyq sportty damytýǵa baǵyttalǵan sharalarǵa qatysýshylar qatary da kóbeıip keledi. Biraq bul jolǵy báıge basqasha, túngi Atyraýdyń kóshelerinen 2000-ǵa jýyq jelaıaq júgirip ótti. Uıymdastyrýshylar doda Astananyń 20 jyldyǵyna arnalǵan sharalar qataryna engizilgenin aıtady.
– Túngi marafon buǵan deıin bolmap edi. Jarys týraly jarııalanǵan kúnnen bastap qyzyǵýshylyq tanytqandar kóp boldy, bul bizge shabyt berdi. Jastar ǵana emes, egde jastaǵy turǵyndar da jarys alańyna shyqty, – deıdi «Atyrau Marathone-2018» uıymdastyrý komıtetiniń vıse-prezıdenti Iýrıı Ponomarev.
Bes shaqyrymdyq joldy alǵashqy bolyp júgirip ótken Bazarbaı Dáýtalıev jeńiske jetti. 24 jastaǵy Bazarbaı Atyraýda ótetin marafondarǵa turaqty qatysyp júr. Márege aldymen kelgen on qatysýshyǵa arnaıy syılyqtar tabystaldy. Endigi marafon kúzde bolady, sondaı-aq jelaıaq balalar arasynda jarys ótkizý de josparda bar.
Baqytgúl BABASh, «Egemen Qazaqstan»
ATYRAÝ