Bir kitapqumar dosymyz bar. «Kishkentaı kezim. Mektepte oqımyn. Aýyldaǵy kitaphanaǵa kúnara baram.
Aldynda «Meniń atym – Qoja» sekildi balalarǵa arnalǵan kitaptardy oqyp júrgenmin. Olar taýsylǵan soń eresekterge arnalǵan kitaptarǵa tis batyra bastadym. Bir kúni qylqıyp taǵy barsam kitaphanashy apaıymyz kúlip: «Áı, sen osyndaǵy barlyq kitapty oqyp tastadyń. Jańasyn qaıdan taýyp beremin», dep kúldi. Sondaǵy qoryqqanym-aı. Rasynda kitaphanadaǵy kitaptardyń bárin oqyp tastasam, jańasy joq bolsa, ishim pysyp ólemin ǵoı deıdi dosym.
Búginde sol dos qazaqtyń kórnekti ǵalymdarynyń biri. О́zi de talaı kitap jazyp tastady.
Biraq búginde «kitaphanada kitap taýsylyp qalady-aý» dep qorqatyn barmaqtaı balalar azaıyp barady. Birin-biri tez aýystyratyn Bilim mınıstrleri reformashyl bolyp aldy. Shetelden ne kórse, bilim salasyna tańady. Sonyń saldarynan oıyndaǵysyn aýyzsha jetkizip aıtýǵa sózdik qory jetpeıtin jastar kóbeıdi.
Búginde kitaphanashylardyń moınyna kátepti qara narlar kóteretindeı júk túsip tur. Kitappen dos bolǵan balanyń bilimdi bolýdan bólek, adamgershiligi mol, izgi azamat bolatyndyǵyn ǵalymdar aıtyp júr. Jaqsy kitap – danalyqqa jeteleıdi. Sondyqtan qyzylordalyq kitaphanashylar oqýshylardyń jazǵy kanıkýl kezinde kitap oqýǵa qyzyǵýshylyǵyn arttyrý úshin jańa jobalardy qolǵa aldy. Búginde kitaphanada kishkentaıdan kitap oqýǵa úıretetin «Kitappen birge ósemiz!» baǵdarlamasy, «BıblıoNıanıa», «Kitaphanadaǵy týǵan kún» jobalary jáne «Kitappen ótken jaz qyzyq» jazǵy oqý baǵdarlamasy aıasynda jumys júrgizilýde. Mektep janyndaǵy lagerler men balalar baqshasyna bıblıodesanttar uıymdastyrylyp turady.
Balalardy oqýǵa úıretý jáne kitaphanaǵa oqyrman tartý maqsatynda kitaphanashylar Syrdarııa aýdanyndaǵy №35 I.Toqtybaev atyndaǵy mektep-lıseıdiń jazǵy tynyǵý lagerindegi balalarǵa saıahat jasady.
Balalar kitaphana tarıhymen, bólimdermen, «Táýelsiz Qazaqstan zalymen», Á.Tájibaev atyndaǵy mýzeımen tanysty. Balalar bóliminiń oqý zalynda «Men jáne meni qorshaǵan álem», «Nelikten? Nege? Ne úshin?» taqyryptaryna qyzyqty oıyndar men vıktorınalar uıymdastyryldy. «Kitaptar demalmaıdy» atty kitap kórmesindegi jańa ádebıettermen tanysty.
Kitap oqý adamnyń janyn tazartady, ómirge qushtarlyǵyn oıatady deıdi. Eń bastysy, jany baı adam bolmaq. Qyzylorda oblysy kitaphanasynda osyndaı jobalar qolǵa alyndy. Ol jaz boıy barlyq kitaphanalarda jalǵasyn tappaq.
Baqtııar TAIJAN, «Egemen Qazaqstan»
Qyzylorda oblysy