1994 jylǵy álem chempıonatynda kolýmbııalyq aıaqdopshy Andres Eskobar baıqaýsyzda óz qaqpasyna gol soǵyp alǵandyqtan, olar jarys jolynan shyǵyp qalǵan-dy. Osyǵan ashýlanǵan fanattar elge oralǵan soń ony alty jerden atyp mert qylǵan.
Al bıylǵy chempıonattyń pleı-off kezeńinde kolýmbııalyqtar 4 shilde kúni penaltıden Anglııa quramasynan utyldy. Osy kezdesýde eki ret qatelik jiberip, qarsylas komandanyń aıyp soqqysyn jasaýyna múmkindik bergen Karlos Sanchesqa jáne bir márte qatelik jibergen Mateýs Ýrıbe men Karlos Bakkany jerlesteri «senderge Andres Eskobardyń kebin kıgizemiz» dep áleýmettik jeli arqyly qorqytyp-úrkitip jatqan kórinedi. Tipti olarǵa «tiri qalǵylaryń kelse, Kolýmbııa topyraǵynan jyraq ketińder» dep shart qoıýda.
Bul oqıǵaǵa baılanysty baspasózge málimet bergen marqum Andres Eskobardyń týǵan inisi Sachı Eskobar: «Aǵamnyń basyna kelgen qasiret qaıtalanbasa eken deımin. Naǵyz fýtbol jankúıerleri bulaı jasamasa kerek. Bul aqymaqtardyń áreketi» dep aıaqdopshylarǵa ara túsýde.
Beken QAIRATULY, «Egemen Qazaqstan»