Ispanııanyń «Real Madrıd» komandasy Krıshtıaný Ronaldýdyń Italııanyń «Iýventýsyna» aýysqanyn resmı túrde habarlady.
«Iýventýs» portýgalııalyq oıynshyny 100 mln eýroǵa satyp aldy. Kelisim boıynsha ıtalııalyqtar bul qarjyny eki jyl ishinde tólep bitýi tıis. Al 33 jastaǵy fýtbolshymen jyldyq jalaqysy 31 mln eýro bolatyn tórt jyldyq kelisimshartqa otyrdy.
Portýgalııalyq shabýylshy ıspanııalyqtar sapynda 9 maýsym óner kórsetti. Osy ýaqyt aralyǵynda ol 438 oıynǵa qatysyp, 451 goldyń avtory (34 het-trık) atandy ári klýb tarıhyndaǵy úzdik surmergen ataǵyna qol jetkizdi. «Realmen» birge 16 tıtýlǵa qol jetkizdi. Olardyń arasynda tórt Chempıondar lıgasy, eki Ispanııa chempıonaty, úsh klýbtar arasyndaǵy álem chempıonaty, eki-ekiden Ispanııa kýbogy men Ispanııa Sýperkýbogy bar.
Krıshtıaný Ronaldý «Realǵa» 2009 jyldyń jazynda «Manchester Iýnaıtedten» kóship kelgen. Ol kezde quny 93,4 mln eýrony qurap, transferlik rekordty jańartqan bolatyn.
«Madrıdte, «Realda» ótkizgen jyldarym ómirimdegi eń baqytty sátterimniń biri. Klýbqa da, qalaǵa da alǵystan basqa aıtarym joq. Maǵan degen mahabbattaryńyzǵa, jyly lebizderińizge myń alǵys.
Biraq ómirime ózgeris engizip, jańa kezeńge qadam basatyn kez keldi dep esepteımin. Mine dál osy sebepti klýbtan meni jiberýin ótindim. Jankúıer qaýym bul oıymdy túsinedi dep úmittenemin.
«Realda» ótkizgen toǵyz jylymda fanattardyń kórsetken qoldaýy erekshe boldy. Bul bir ǵajap ýaqyt ekeni daýsyz.
Al áriptesterim naǵyz óz isiniń mamandary boldy. Biz birge Chempıondar lıgasyn úsh márte qatarynan, al sońǵy bes jylda tórteýin jeńip aldyq. Mine osynyń arqasynda tórt Altyn dop pen úsh Altyn býtsa júldesin jeńip aldym. Klýbqa, prezıdentine, dırektorlaryna, áriptesterime, dárigerlerine, fızıterapevterine jáne basqa da qyzmetkerlerine alǵys aıtamyn.
Uzaq oılanyp baryp osyndaı sheshimge keldim. Men ketip baramyn, biraq qaıda júrsemde bul jeıdeshe men «Santıago Bernabeý» júregimde bolady.
Bárińizge rahmet! Toǵyz jyl buryn stadıonda alǵash ret aıtqanymdy taǵy da qaıtalaımyn – Hala Madrid», – dedi Ronaldý.
Aıta keteıik, «Real» endi Ronaldýdyń ornyn basatyn oıynshylardy izdeýge kiristi. Bul tizimde Neımar, Kılıan Mbappe, Eden Azar kósh bastap tur.