Almatyda Qazaqstannyń halyq ártisi, ataqty kúıshi Qarshyǵa Ahmedıarovty eske alý keshi bolyp ótti. Qurmanǵazy atyndaǵy Qazaq memlekettik akademııalyq halyq aspaptar orkestriniń osy oraıdaǵy konserti birtýar darynnyń «Atyraý-Aqjaıyq» kúıimen bastaldy. Orkestrge Qarshyǵanyń uly Erbolat Ahmedıarov dırıjerlik etti. Basqa da maıtalman kúıshiler, óner sańylaǵynyń Saltanat Qudaıbergenova sııaqty shákirtteri onyń «Qosbasar», «Elbasy», «Arpalys», «Tabyný» dep atalatyn toptama kúılerin, anasyna arnaǵan «Mama», nemeresine arnaǵan «Juldyzym», taǵy basqa ánderin oryndady. Eske alý konserti kúı uranymen túıindeldi.
Qazaqstannyń eńbek sińirgen qaıratkeri, orkestr dırektory Erkebulan Músirep, kúıshiniń jar qosaǵy Nurbıke jeńgeı kópshilikke aq tilekti estelik áńgimeler aıtty.
30 jyldaı birge qyzmettes bolǵan ini dosy, orkestrdiń qazirgi kórkemdik jetekshisi, kúıshi Tuıaqberdi Shámelovke 1970 jyly Qarshyǵa aǵasy ataqty sheber Romanenko jasaǵan dombyrasyn syılaǵan eken. Sahnaǵa kóterilgen kúıshi Tuıaqberdi sol dombyrany 41 jyldan keıin ustazynyń otbasyna qaıyra syılady. «Bul dombyramen Qarshyǵa aǵamyz konsevatorııany bitirip, jeńgemizge úılenip, shyǵarmashylyq shabytty ári baqytty shaqtaryn bastan keshire júrip, talaı kúılerdi quıqyljyta oınaǵan edi. Endi ol Qarshekeńniń kózindeı bolyp, otbasynyń qasterli jádigerleriniń qatarynan oryn alsyn» dedi jón biletin óreli ónerpaz.
Qorǵanbek AMANJOL.