Búgin Úkimet úıinde Premer-Mınıstri Baqytjan Saǵyntaev Shveısarııanyń federaldyq keńesshisi jáne ekonomıka, bilim berý jáne zertteýler federaldy departamentiniń basshysy Iohann Shnaıder-Ammanmen kezdesý ótkizdi.
Kezdesý barysynda saýda-ekonomıkalyq qarym-qatynasty odan ári nyǵaıtý, ınvestısııalyq áriptestik jáne aımaqaralyq ózara is-qımyl máseleleri, sondaı-aq kólik-logıstıkalyq ınfraqurylymdy damytý boıynsha birlesken jobalardyń perspektıvasy talqylandy.
B. Saǵyntaev elimizdiń energetıka, kólik, shaǵyn jáne orta bıznes salalaryndaǵy tyǵyz ári ózara tıimdi yntymaqtastyqqa, sondaı-aq jańa tehnologııalar men noý-haý transfertin retteýge qyzyǵýshylyq tanytatynyn atap ótti. Búgingi tańda Qazaqstanda shveısarııalyq kompanııalardyń qatysýymen mashına jasaý, qurylys, agroónerkásip jáne taý-ken metallýrgııa keshenderi salalarynda jobalar sátti iske asyrylýda.
Sonymen qatar Premer-Mınıstr QR-da sheteldik ınvestorlar úshin eleýli salyqtyq jáne kedendik jeńildiktermen qolaıly ınvestısııalyq ahýal jasalǵanyn aıtty. 2017 jyldyń basynan beri Shveısarııa azamattary úshin 30 kúndik vızasyz rejım engizildi. Qabyldanǵan sharalar aldaǵy jyldary Qazaqstan ekonomıkasyna ınvestısııalar salyp, tehnologııalar transfertin júzege asyrýshy Shveısarııa kásiporyndarynyń sanyn ulǵaıtýǵa jol ashady.Buǵan qosa, B. Saǵyntaev Shveısarııanyń qarjy ınstıtýttaryn «Astana» halyqaralyq qarjy ortalyǵynyń jumysyna belsene qatysýǵa shaqyrdy jáne Shveısarııa men Qazaqstan halyqaralyq qarjy qurylymdarynyń aıasynda tabysty yntymaqtasyp, Halyqaralyq valıýta qory men Dúnıejúzilik bank janyndaǵy bir toptyń quramyna kiretinin atap ótti.
2017 jyldyń qorytyndysy boıynsha Qazaqstan men Shveısarııa arasyndaǵy taýar aınalymy $3,2 mlrd qurady (eksport — $3,1 mlrd), bul 2016 jylǵa qaraǵanda 21% artyq. 2018 jyldyń qańtar-mamyr aılarynda taýar aınalymy $1,14 mlrd qurady (ósim – 95%), eksport — $1,09 mlrd. 2005–2017 jyldary Shveısarııadan Qazaqstanǵa tikeleı ınvestısııalardyń jalpy aǵyny $20,6 mlrd qurady. 1 mamyrdaǵy jaǵdaı boıynsha QR-da shveısarııalyq qatysýmen 436 zańdy tulǵa, bólimsheler men ókildikter tirkelgen