Oblys ortalyǵyndaǵy Estaı atyndaǵy qalalyq mádenıet saraıynda Ertis Cinema halyqaralyq kınofestıvaliniń ashylý saltanaty ótti.
Festıvalǵa kelgen qonaqtar dástúrli túrde qyzyl kilem tóselgen jol men júrip ótti. Elimizdiń kınematograftar odaǵynyń tóraǵasy, kınorejısser, ssenarıst, «Shal», «Ábilqaıyr han» kartınalarynyń avtory Ermek Tursynov jol bastap berdi.
«Konkýrsqa klassıkalyq kınodan bastap kásibı kamera men uıaly telefonǵa túsirilgen andegraýndqa deıin jiberilgen. Olardyń arasynda tarıhı, bıblıografııalyq, komedııalyq fılmder bar. Qazirgi qoǵamnyń mádenıeti, zamanaýı problemalary sııaqty taqyryptarǵa baılanysty jumystar kezdesedi. Avtorlardyń kóbiniń jastar qatarynan bolýy uıymdastyrýshylardy qýantty. Konkýrsqa T.Júrgenov atyndaǵy ulttyq óner akademııasy, ulttyq óner ýnıversıteti, memlekettik emes «Turan» ýnıversıtetiniń stýdentteri belsendi qatysty. Kınofestıvaldiń qazylar alqasy quramyna kınematograftyń ataqty qaıratkerleri bar, -deıdi uıymdastyrýshylardyń biri Salaýat Temirbolatuly.
Birneshe kún boıy oblys ortalyǵyndaǵy kınoteatrlarda qysqa metrajdy fılmder kórsetiledi. Festıvalge álemniń 20 memleketinen 207 jumys qabyldanypty. Irikteýden ótken 64 jumystyń 15-i derekti fılm. Tapsyrystar 2018 jyldyń 1-maýsymyna deıin ertiscinema.kz saıty arqyly qabyldanǵan.
Kınofestıval «Rýhanı jańǵyrý» baǵdarlamasyn júzege asyrý sheńberinde qysqametrajdy fılmderdi kópshilikke taratý jáne talanttardy izdep, tanystyrý maqsatynda uıymdastyryldy.
Festıvalǵa qatysý úshin uzaqtyǵy 30 mınýtqa deıin, 2016 jyldan keıin túsirilgen qysqametrajdy oıyn jáne derekti fılmder qabyldandy. Bir avtordan nemese shyǵarmashylyq birlestikten qabyldanatyn jumystardyń sany 4 aspaýy tıis. Festıvaldiń baǵdarlamasyna sáıkes aldymen oıyn kınosynyń eki saǵattyq toptamasy, odan keıin «Álem kınosynyń injý-marjany» taqyrybyndaǵy fılmder kórsetiledi.
Al, jeńimpazdar «Úzdik derekti fılm», «Úzdik oıyn fılmi», «Astana týraly úzdik fılmi», «Qazylar alqasynyń arnaıy júldesi», «Kórermender kózaıymy júldesi» boıynsha anyqtalady.
- Festıvaldiń ótýi basqa oblystarǵa úlgi. Kórermenderdiń barlyǵyn jaqsy kınoǵa úıretý kerek. Ertis Cinema festıvalin dástúrge aınaldyrǵan jón,- deıdi Ermek Tursynov.
Kınofestıval ótkizý ıdeıasyn bizdiń jerlesimiz, Reseı halyq ártisi, kınorejısser Vladımır Hotınenko, prodıýser ári rejısser, Eýrazııalyq radıo jáne televızııa akademııasynyń vıse-prezıdenti Ý Szıan (Mr.WuJiang), rejısser, ssenarıst, akter Satybaldy Narymbetov qoldapty.
Jeńimpazdardyń esimderi 14 shildede Ertis Rromenade sahnasynda atalatyn bolady
Farıda BYQAI
«Egemen Qazaqstan»
PAVLODAR
Sýretti túsirgen: Valerıı Býgaev