Egemendikpen birge elge oralyp edi

Sózimdi Elbasy Nursultan Nazarbaevtyń 1992 jyly Almatyda ótken Dúnıejúzi qazaqtarynyń I Qurylta­ıyn­da: «Bizder talaı-talaı oqı­ǵalardyń kýási bolǵan asqar taýlar men ulan-ǵaıyr dala­nyń túlegimiz. Bul – bizdiń san býyn babalarymyzdyń kir jýyp, kindik kesken jeri, kól jazıra óńirimiz, atadan qalǵan baıtaq muramyz, altyn bosa­ǵamyz», degen lebizinen bas­taǵym keledi. Iá, HH ǵasyr­daǵy ár túrli alasapyran men saıası qýǵyn-súrginderdiń sal­da­rynan myńdaǵan qazaqtar atamekenderin tastap, bas saý­ǵalap, shetelderge ketýge máj­búr boldy. О́kinishke qaraı, óz elinen alystap, álemniń ár túkpirinde shashyrap júrgen sol qandastarymyzben baıla­nys jasaý, olardyń basyn qosyp atajurtqa ákelý máse­lesi uzaq jyldar boıy qolǵa alynbaı kelgen edi. Bul rette, Qazaqstan Respýblıkasynyń Tuńǵysh Prezıdenti Nursul­tan Nazarbaevtyń eńbegi ushan teńiz. Jalpy Keńes Odaǵynyń quramynda bolǵan respýblı­ka­­lardyń ishinde sheteldegi óz otandastaryna jan-jaqty qam­qorlyq jasaýdy birinshi bolyp qolǵa alǵan Qazaqstan ekendigin rızashylyqpen aıta ketkenimiz jón bolar. Olaı deıtinimiz, egemendikke ıe bolǵan kúnnen bastap Elbasy júrgizgen salıqaly saıasattyń arqasynda óz tarıhı Otany – Qazaqstanǵa 1 mıllıonǵa jý­yq qazaq baýyrlarymyz oral­dy emes pe. Búgingi kúni olar­dyń elimizdiń gúldenip ór­kendep ósýine, tilimiz ben ónerimizdiń jáne demo­gra­fııalyq ahýalymyzdyń da­mýy­na óz úlesterin qosyp jatqany jurtshylyqqa jaqsy málim. Sóz oraıynda, aǵaıyndar­dyń elge oralýy men olardyń ornalasýyna sol kezdegi Eńbek mınıstrliginiń quramynan al­ǵash Kóshi-qon bólimin uıym­dastyrǵan Saıat Beısenovtiń eńbegi zor der edim. Sondaı-aq, 90-jyldary osy kóshi-qon máselelerimen tikeleı aına­lys­qan azamattardy aıtpaı ketý múmkin emes. Olar: Esmuqanov Ǵazız, Kamalıev Pamır, Raqymjanov Nurlan, Izbanov Muhıt, Ábishev Qa­bylsaıat, Qonaqbaev Marat, Qarjaýbaev Aslan, Qusaıy­nova Ǵalııa, Doǵalov Amangeldi jáne taǵy basqa áriptes­terimiz. Sondaı-aq jergilikti jerlerde oralman aǵaıyndar­dyń durys ornalasyp, sol ortaǵa sińisip ketýlerine qam­qor bolyp, kómek kórsetken Omarov Bazarbek, Qaljanuly Túmenbaı, Ábdiqalyqov Idaıat, Sabanshıev Baǵjan, Ul­tanbaev Kemel, Murynova Janat, Medeýbaeva Ǵazırat, Aýjanov Bolat, Muqııaev Oral, Jaqsylyquly Muhıt, Álıhan Amantaı, Bolat Zaýt, San­syzbaı Qurmetbektiń esimderi el esinde. Egemendikpen bastalǵan uly kóshtiń basy-qasynda bol­ǵan sol kezdegi sheteldik aza­mattarǵa da rahmet! Bul ba­ýyrlarymyz búgin Qazaqstan Respýblıkasynyń mań­daıal­dy azamattary bolyp otyr. Olar bir kezdegi Mońǵolııanyń Premer-mınıstriniń oryn­ba­sary qyzmetin atqarǵan tarıh ǵylymynyń doktory Zar­dyhan Qınaıatuly, Mońǵol halyq Hýralynyń depýtaty bolǵan ǵalym Sartqojauly Qarjaýbaı, Qytaıdan atamekenine kelip ǵylym doktory atanǵan Másimhanuly Dúken, Reseıden kóship kelgen ǵalym Qabyldınov Zııabek, Abaı atyndaǵy Qazaq Ulttyq pedagogıka ýnıversıtetiniń oqy­týshysy, ǵylym doktory Baımolda Dosan jáne taǵy basqalary. Úlken kóshtiń uly kóshke aınalýyna sebepker bolǵan aza­mattardyń esimderi el esin­de qalary sózsiz. Elimizdiń egemendigimen qatar kelgen 20 jyldyq mereıtoıymyz qutty bolsyn! Elge el qosylyp, hal­qymyzdyń mereıi kóte­rilip kele jatqan búgingi jaǵ­daıymyzǵa táýbe deıik, otandastar! Marat TOQSANBAEV, Ishki ister mınıstrligi Kóshi-qon polısııasy komıtetiniń qyzmetkeri. Astana.