Rýdnyı qalasyndaǵy jergilikti polısııa qyzmetkerleri Maqsut Dosybaev pen Ramzan Tımýhaev kóshede júrek talmasynan qulaǵan azamatqa jedel medısınalyq kómek kórsetip, ómirin saqtap qaldy.
Patrýlde júrgen jergilikti polıseıler Parkovaıa kóshesinde qulaǵan er kisini baıqap qaldy. Olar jyldam jetip, oǵan medısınalyq alǵashqy kómek kórsetti.
«Er kisiniń oń jaǵy uıyp, ol óz betimen qozǵala almaı qaldy. Biz «Jedel járdem» qyzmetin kútip turmaı, ony aýrýhanaǵa jetkizdik. Biz ár mınýttyń qymbattyǵyn sezdik» deıdi jol-patrýldik polısııasy rota vzvodynyń komandıri Maqsut Dosybaev.
Naýqasty aýrýhanaǵa jatqyzǵannan keıin polıseıler dárigerlerden onyń ınsýlt, odan keıin júrek talmasy bolǵanyn bildi. Bul kúnde naýqas qalalyq aýrýhananyń jan saqtaý bóliminde jatyr. Plısııa aǵa serjanty Maqsut Dosybaev segiz jyldan beri adamdardy birneshe ret osyndaı qıyn jaǵdaıdan aman alyp shyqqan edi. Al qatardaǵy polıseı Ramzan Tımýhaev aýrýǵa alǵashqy kómek kórsetýdiń qanshalyqty mańyzdy ekenin birinshi ret kórdi.
«Eshqandaı tolqyǵanymdy sezgen joqpyn. Ár polıseı kez kelgen ýaqytta kómekke daıyn bolýy kerek, sondyqtan medısınalyq bilim qyzmettik daıyndyqtyń bólinbes bir bóligi» deıdi Ramzan.
Júrek talmasynan zardap shekken kisiniń týysy oblystyq ishki ister departamentiniń bastyǵy Beket Aımaǵambetovke polıseılerge jyldam ári elgezektigi úshin alǵys aıtýdy ótinip, hat jazdy.
Názıra Járimbet,
«Egemen Qazaqstan»
Qostanaı