Astana qalasy mádenıet jáne sport basqarmasynyń basshysy Bolat Majaǵulov Qazaqstan djıý-djıtserleriniń kezekten tys konferensııasynda qaýymdastyqtyń jańa prezıdenti bolyp saılandy, dep habarlaıdy basqarmanyń baspasóz qyzmeti.
Bolat Majaǵulov Tokıodaǵy Azııa chempıonatynyń qola júldegeri, brazılııalyq djıý-djıtsýden kók belbeýdiń ıegeri.
"Qazaqstan Respýblıkasynyń djıý-djıtsý qaýymdastyǵy elimizde atalmysh sport túrin damytý maqsatynda quryldy. Qaýymdastyq qyzmeti Qazaqstannyń ulttyq komıtetimen tanylyp, Qazaqstan Respýblıkasynyń mádenıet jáne sport mınıstrliginiń Sport jáne dene shynyqtyrý komıtetimen akkredıttelgen. Sonymen qatar Qaýymdastyq Halyqaralyq djıý-djıtsý federasııasynyń (JJIF) múshesi bolyp tabylady", delingen baspasóz habarlamasynda.
Qaýymdastyq quramyna Qazaqstannyń 16 oblysynyń jáne Astana men Almaty qalalarynyń federasııalary kiredi. Qazir sportshylar Jakartadaǵy (Indonezııa) Azııa oıyndaryna daıyndyq ústinde.