«Qazaqstan temir joly» UK» AQ Basqarma Tóraǵasy Qanat Alpysbaev Astanada ótken Qazaqstandyq-Shveısarııalyq Iskerlik keńesiniń 4-shi otyrysyna qatysyp, quttyqtaý sóz sóıledi.
Otyrysqa Shveısarııa ekonomıka, bilim jáne zertteýler boıynsha Federaldyq departamentiniń (Mınıstrlik) basshysy I.Shnaıder-Ammann,Shveısarııanyń Qazaqstandaǵy jáne Tájikstandaǵy elshisi Ý. Shmıd, Qazaqstandaǵy Ishki saýda palatasy Basqarmasynyń tóraǵasy A. Erenov, sondaı-aq memlekettik organdar men eki eldiń bıznes qaýymdastyǵy ókilderi qatysty.
Iskerlik Keńestiń qazaqstandyq taraptaǵy teńtóraǵasy Q. Alpysbaev bul basqosýdyń Qazaqstan men Shveısarııa bıznes qaýymdastyǵynyń ózara tıimdi áriptestik maqsatynda belsendi dıalog júrgizýi úshin mańyzdy ekenin atap ótti.
«Shveısarııa – Qazaqstan men EO-nyń strategııalyq ekonomıkalyq áriptesi jáne taýar aınalymy kólemi boıynsha eýropalyq elder arasynda tórtinshi oryndy ıemdenedi», – degen Q. Alpysbaev, 2005 jyldan 2017 jylǵa deıingi aralyqta Shveısarııadan Qazaqstanǵa tikeleı quıylǵan jalpy ınvestısııa kólemi 20,6 mlrd AQSh dollaryn quraǵanyn aıtyp ótti. Al osy aralyqta Qazaqstannan Shveısarııaǵa tikeleı ınvestısııa kólemi – 823 mln AQSh dollary.
Q. Alpysbaev Qazaqstanda ekonomıkanyń «shıkizattyq emes» sektory qarqyndy damyp jatqanyn, sıfrlandyrý boıynsha memlekettik baǵdarlamalar sátti júzege asyrylyp, ınvestorlar úshin ınfraqurylymdyq jáne ınstıtýsıonaldyq jaǵymdy ahýal qalyptasyp otyrǵanyn atap ótti.
Sońǵy 10 jyldyqta Qazaqstannyń kólik-logıstıkalyq júıesin damytýǵa 30 mlrd dollardaı qarjy jumsalǵan. 2000 km artyq jańa temirjol telimderi salynyp, jyljymaly quram jańǵyrtylǵan, transshekaralyq kóliktik-logıstıkalyq toraptardyń ótkizý qabileti arttyrylyp, qazaqstandyq kólik dálizderiniń boıynda kóliktik-logıstıkalyq ortalyqtar men termınaldardyń zamanaýı jelisin qalyptastyrý boıynsha jumystar júrgizildi.
Qabyldanǵan sharalar Qazaqstannyń pozısııasyn halyqaralyq reıtıngterde, ıaǵnı Dúnıejúzilik bank bıznesin júrgizý jeńildigi ındeksinde jaqsartty, onda Qazaqstan álemniń 190 eliniń arasynda 36-shy oryndy ıelense, logıstıka tıimdiligi ındeksinde 77-shi orynǵa turaqtap otyr, bul TMD elderi arasyndaǵy úzdik kórsetkishtiń biri bolyp tabylady.
Qazaqstan-Shveısarııa Iskerlik keńesiniń 4-shi otyrysyna qatysý barysynda shveısarııalyq delegasııa Kaspıı teńizindegi porttyq ınfraqurylymdy aralap, Aqtaý jáne Quryq sııaqty eki qazaqstandyq porttardyń zamanaýı logıstıkalyq qýattylyǵymen tanysty. «Qazaqstan men Shveısarııa arasyndaǵy Iskerlik keńestiń ýaqyttylyǵy men talap etilýi eki eldiń bıznes qaýymdastyqtary arasynda qyzyǵýshylyqtyń ósip otyrǵanyn aıqyndaıdy», – deı kele Q.Alpysbaev, ekonomıkalyq ózara árekettesý sııaqty keńeıtilgen másele boıynsha baılanysty damytý úshin talqylaýlardyń qajettiligine senim bildirdi.