Qazaq degen ult bolamyz, ulymyz,
Qatar júrgen qýanysh pen muńymyz.
Azattyqtyń aıalady aq tańy,
Qadirleıik, qasterleıik muny biz.
Aıtylǵanmen sarqylmaıdy syrymyz,
Qazaq bolyp ǵumyr keshtik shyny biz.
Kóshpendiniń kúıin keship sarylyp,
Saǵynyshtan alaý aldy jyrymyz.
Tektiliktiń qany boıǵa tunǵannan,
Ana súti jarqyn júzdi jýǵannan.
Qabyl bolyp aq batasy atanyń,
Qazaq batyr, qazaq aqyn týǵannan.
Qazaq degen qasıetti halyqpyz,
Arqa tutar Alataýdaı alyppyz.
Kóz alartyp, jaý jaǵadan alǵanda,
Jan bersek te ardy saqtap qalyppyz.
Sar dalany gúl jaınatty nurymyz,
Kóterildi kókke bıik týymyz.
Shalqaıǵannyń shań qaptyrdyq shashasyn,
Syılasqannyń qulaq kesti qulymyz.
О́r minezben shartarapqa taradyq,
Naıza ustap, namys úshin jaradyq.
El degende ezilip bir etjúrek,
Bıikterge kózdi tigip qaradyq.
Qazaq degen jurt bolamyz – dara biz,
Alǵa tartqan aqyl-oımen danamyz.
Jaqsylyqqa janushyryp júgirsek,
Jamandyqqa qııa baspas sanamyz.
Adaldyqqa ot bop laýlap janamyz,
Kóńil tússe kóktegini alamyz.
Bir atymdaı nasybaıǵa ókpelep,
Alystaıdy keıbir kezde aramyz.
Jumylǵanda judyryqtaı túıilip,
О́zge jurtyń qaraı berer súıinip.
Aq kóńildiń arǵymaǵy azbaıdy,
Qaıteıik biz qasaqana kúıinip.
Qazaq degen erekshe elmiz, senińiz,
Ońnan soqqan qońyr samal jelimiz.
Túgin tartsań maıy shyqqan móldirep,
Ulan-baıtaq qazynaly jerimiz.
Tatýlyqty tirek etken sánimiz,
Dostar úshin shyrqalady ánimiz.
Ata-baba amanatyn ardaqtap,
Týy astyna toptasqanbyz bárimiz.
Taǵdyrynyń tálkegine kónetin,
О́z násibin mańdaı termen teretin.
Qazaq osy, aǵaıyny surasa,
Baýyr eti – balasyn da beretin.
Qazaq degen qonaqtaryn qut kórgen,
Qushaq jaıyp, oryn bergen, nyq tórden.
Baryn shashyp, taýyssa da tyqyrlap,
Baq dáýletti táńirinen, kútti elden.
Tór ozdyryp, táý etedi qudasyn,
Qaıtarymdy qaıtyp odan surasyn?!
Kisilikti tarazyǵa salatyn,
Aǵaıynnyń arasynda bul da syn.
Sálem berip dosy kelse alystan,
Aq nıetpen tós túıisip tabysqan.
Kórshilerin kóshirip ap úıine,
Máre-sáre qýanyshpen qaýyshqan.
Qazaq degen baryn shashqan bir toıǵa,
Qalsa-daǵy ertesine myń oıǵa.
Qapalanyp, ókinishte qalmaǵan,
Sene bilip jaratýshy Qudaıǵa.
Mereıtoılar jasalady tizilip,
Úmitterdi jalǵaıtyny izgilik.
Aıyna emes, jylyna emes bir kúnde,
Qazaq úshin júrgen jaqsy júz kúlip.
Qazaq degen ómir syryn túsingen,
Qulaǵyna bala kezden kúı sińgen.
Aýyldastyń taıy ozsa báıgede,
Aty ozǵandaı rahattanyp súısingen.
Qarapaıym, ádildikti pir singen,
Qýat alǵan at dúbiri – dúrsilden.
Badyraıtyp betke aıta bermeıdi,
Kóńil qalsa ishteı ǵana kúrsingen.
Sypaıylyq bolmysyna jarasqan,
Kóńiline syıyp keter kók aspan.
Qansha qıyn kún týsa da basyna,
Jany ashyp, bir-birine qarasqan.
Qazaq – degen bárinen de balajan,
Urpaqtaryn baqytyna balaǵan.
Shańyraqqa ıe bolyp uldary,
Qyz bitkender óris taýyp taraǵan.
Qazaq degen qadirlegen qarttaryn,
Án men jyrǵa arqaý etken attaryn.
Keýdeleri altyn sandyq sııaqty,
Eske alady qyzyq dáýren shaqtaryn.
Ata-saltyn qurmet tutyp saqtaıdy,
Adaldyqtyń arǵymaǵyn baptaıdy.
Kemshilikti kóre tura keıde sol,
Keshirimmen «jigitsiń» dep maqtaıdy.
Qazaq – degen aıta berse keń halyq,
Sheteldikter júr ǵoı oǵan tańǵalyp.
Túr-túsine, tiline de qaramaı,
Baýyrym dep qushaq jaıar jar salyp.
Men qazaqpyn tákapparmyn, irimin,
Momyndardyń máıegimin, pirimin.
Qazaq dese qany qaınap shyǵatyn,
Sol qazaqtyń qatardaǵy birimin.
Ahmetjan QOSAQOV.
Jambyl oblysy,
Shý aýdany.