Kezdesý barysynda Nursultan Nazarbaevqa Ulttyq banktiń birinshi jarty jyldyqta atqarǵan jumystarynyń qorytyndylary jóninde esep berildi, dep habarlaıdy Aqordanyń baspasóz qyzmeti.
Qazaqstan Prezıdenti qazirgi ýaqytta valıýta-qarjy naryǵyndaǵy turaqtylyqty saqtaý jáne ekonomıkany ári qaraı damytý úshin elimizde qajetti jaǵdaı jasalǵanyn atap ótti.
– Qazir bizde ulttyq valıýta men ekonomıkanyń turaqtylyǵyn qamtamasyz etý úshin múmkindikter bar. Birinshi jarty jyldyqta ekonomıka 4 paıyzdan astam ósti. Qubylmaly baǵamǵa kóshkenimiz durys boldy. Belgili bir deńgeıde aýytqýlardyń bolatynyna úırený kerek. Bul turǵyndardyń ál-aýqatyna áser etpeıdi, – dedi Nursultan Nazarbaev.
Qazaqstan Prezıdenti bank sektoryn saýyqtyrý úshin qabyldanǵan sharalar jóninde aıtty.
– Memleket tarapynan bankterge aıtarlyqtaı kómek kórsetildi. Bank júıesin qoldaý maqsatymen úsh trıllıon teńge bólindi. Sonymen qatar, valıýtalyq retteý jáne Ulttyq banktiń qyzmetin jetildirý máseleleri jónindegi zańnamany qaıta qaradyq. Sondyqtan, bankterdiń ekonomıkaǵa, sonyń ishinde shaǵyn jáne orta bıznes salasyna nesıe berý jumysyn jandandyrý qajet, – dedi Nursultan Nazarbaev.
Memleket basshysy turǵyndardyń salymdaryn adal jumys istemeıtin aksıonerlerdiń alaıaqtyq áreketterinen qorǵaý maqsatymen Ulttyq bank tóraǵasynyń nazaryn bank sektorynyń jumysyn retke keltirý qajettigine aýdardy.
D.Aqyshevtiń málimetine sáıkes, negizgi kórsetkishter boıynsha, elimizdiń qarjy naryǵynda turaqty jaǵdaı qalyptasyp otyr.
– 2018 jylǵy maýsym aıynyń qorytyndysy boıynsha ınflıasııanyń jyldyq kórsetkishi 5,9 paıyzdy qurady. Bul – sońǵy úsh jyl ishindegi eń tómengi kórsetkish. Ulttyq bank ınflıasııa deńgeıin 2020 jylǵa qaraı 4 paıyzǵa deıin tómendetýdi kózdep otyr, – dedi Ulttyq bank tóraǵasy.
D.Aqyshev Nursultan Nazarbaevqa ulttyq valıýta baǵamynyń ózgerýine áser etetin negizgi faktorlar jóninde baıandady.
– Teńge baǵamynyń ózgerýine áser etetin negizgi faktor – Qazaqstannyń saýda-ekonomıkalyq naryǵyndaǵy valıýtalyq-qarjylyq jaǵdaı. Ekinshi faktor – basqa valıýtalarǵa qatysty dollardyń búkil álem boıynsha nyǵaıýy. Bul oraıda, kásiporyndar men turǵyndardyń mundaı qubylmaly baǵamǵa beıimdelgenin atap ótý kerek. Jalpy, elimizde sheteldik valıýtaǵa degen suranystyń tómendegeni baıqalyp otyr, – dedi Ulttyq bank tóraǵasy.
Kezdesý sońynda Memleket basshysy birqatar naqty tapsyrma berdi.