Muhıttyń arǵy jaǵynan jetken súıinshi habar kúlli qazaqtyń abyroıyn arttyrdy. Qara dombyrany serik etken «Bastaý» dýeti Gollıvýd tórinde ótken áıgili dúnıejúzilik «Álem chempıony» (World championships) baıqaýynda top jaryp, altyn medaldy qanjyǵasyna baılady.
World championships óner baıqaýy – jyl saıyn Gollıvýd tórinde ótetin álemdik deńgeıdegi aýqymdy jobalardyń biri. О́z tarıhynda 22-shi márte uıymdastyrylyp otyrǵan óner dodasynyń negizgi uıymdastyrýshylary – gollıvýdtyq jergilikti prodıýsserlik kompanııa. Qazaqstan atynan tuńǵysh ret qatysyp otyrǵan «Bastaý» toby aıtýly jobada «Aspaptyq oryndaý» atalymy boıynsha saıysqa tústi. Jalpy sany 72 el – Kalmar, Palaý sııaqty shaǵyn araldardan bastap, Aýstralııa, Qytaı, Kanada, AQSh, Eýropa, Azııa memleketteri, Afrıkanyń kóptegen elderi qatysqan baıqaýdyń 3 kezeńge sozylǵan talabynan súrinbeı ótken qazaqstandyq óner tobynyń qos ishekten tógilgen kúmbir kúıine álem tamsanyp, tańdaı qaqty.
«Bul konkýrstyń jalpy jas ónerpazdardyń ónerdegi jolyn ashyp, juldyzyn jaǵýda múmkindigi óte mol. Jobanyń ereksheligi sol – uıymdastyrylýy men ótý tártibi kádimgi sport olımpıadasy sııaqty. Tek bul jerde árkim sport túri emes, óner ólsheminde saıysqa túsedi. Tipti ashylý rásiminiń ózi sporttyq olımpıadadan kem emes, ár memleket óz týyn jelbiretip shyǵyp, ulttyq ónerin tanystyrady. О́kinishke qaraı bizdiń elde bul baıqaý týraly kópshilik bile bermeıdi. Alǵash bolyp «Bastaý» dýeti qatysyp, ózderińiz kýá bolǵandaı, óte joǵary deńgeıde óner kórsetip, qazaq mýzykasyn Amerıka aspanynda áýeletip, tórtkúl dúnıeni tańdaı qaqqyzdy. Gollıvýd ónerdiń shyńy bolsa, biz sol shyńdy baǵyndyrýymyz kerek. Kelesi jyly bizge úlken múmkindik týyp otyr. Sebebi munda ár eldiń ulttyq dırektory, ulttyq bapkeri bolady eken. Bıyldan bastap baıqaýdyń bapkerligine men taǵaıyndalyp, keleshekte jaqsy jobalardy qolǵa alý josparda bar. Bizge uıymdastyrýshylar tarapynan usynys tústi, aldaǵy jyly maǵan tek dombyrashylarmen ǵana emes, ózge ónerpazdarmen qatysýǵa resmı túrde ruqsat berildi», deıdi «Bastaý» tobynyń prodıýseri Alpamys Shárimov.
Bul jeńis – qara dombyrany janyna serik etken «Bastaý» tobynyń alǵashqy jeńisi emes. Buǵan deıin Latvııanyń astanasy Rıga qalasynda ótken aıtýly óner baıqaýynda bas júldeni enshilese, araǵa az ǵana ýaqyt salyp Ierýsalımde uıymdastyrylǵan «Álem mýzykasy» konkýrsynda da jeńis tuǵyrynan kóringen dombyrashylar dýeti aldaǵy maqsat pen jospar aýqymyn ulǵaıtyp, muhıttyń arǵy jaǵyn moıyndatýǵa bel sheshe kirisken bolatyn. Sol úmit aldamaı, mine, Gollıvýdtyń aıtýly óner baıqaýynyń altyn tuǵyrynan kórindi. Amerıka tórinde Qurmanǵazynyń «Adaı», Nurǵısa Tilendıevtiń «Balamıshka», Oljas Súleımenovtiń «Eýrazııa», Temirlan Oljabaıdyń «Bastaý» jáne ózge de halyq kúılerinen popýrı oryndap, ulttyq mýzykanyń qunarly únin jahanǵa pash etti. Top prodıýseri Alpamys Shárimovtiń aıtýynsha, qazaqy ún tabıǵatyna tań qalmaǵan maman kemde-kem.
Atalǵan baıqaýda ár memleket ónerdiń san túrli janry boıynsha saıysqa túsip, baqtaryn synady. Máselen, bıylǵy dodada Qazaqstan «Aspapta oryndaý» atalymy boıynsha qatyssa, álemniń túkpir-túkpirinen jınalǵan ózge qatysýshylar vokal, bı, model, akterlik sheberlik, sırk óneri sııaqty túrli janr boıynsha básekege tústi.
«Jalpy, biz úshin eń basty qoldaý osy baıqaýdyń aldynda Prezıdenttiń shildeniń birinshi demalysyn «Ulttyq dombyra kúni» dep jarııalaýy boldy. Qolymyzǵa ustaǵan aspabymyzdyń óz merekesiniń, óz kúni bolýy jigitter úshin de, men úshin de úlken motıvasııa boldy. Odan keıin bizge qaı kezde de qoldaý bildirip, janashyrlyq kórsetip júretin Qazaq Ulttyq óner ýnıversıtetiniń rektory Aıman Musaqojaevaǵa alǵys aıtamyz. Jigitterimiz osy bilim ordasynda bilim alady. Al ol kisi naǵyz óner janashyry, ónerge qulshynys bildirgenderge árdaıym qoldaý kórsetýge ázir» dep top jetekshisi týǵan eline de taýdaı alǵysyn jetkizdi.
Rasymen de, qazaqtyń ózine ǵana tán ulttyq kolorıtke baı mýzykasy, ulttyq aspabynyń, óneriniń qudireti qaı kezde de elimizdiń bedelin asqaqtatyp, Alash abroıyn álem keńistiginde moıyndatyp keledi. Kezinde Parıj kógin áýezdi ánimen tańdaı qaqqyzǵan Ámireden bastap, Qurmaǵazy kúıimen jahandyq jańalyqqa aınalǵan búgingi «Bastaý» dýetiniń Gollıvýdtaǵy aıtýly jeńisi shyn máninde tutastaı ulttyń abyroıy, bedeli ekeni sózsiz. Kúni keshe Dombyra kúniniń jalpy ulttyq mereke retinde toılanýynyń ózi de qazaqtyń tól óneriniń qaı kezde de kórkemdik deńgeıiniń joǵary, sapalyq mazmunynyń san tarapty ekendigin áıgilese kerek.
Nazerke JUMABAI, «Egemen Qazaqstan»