Astana qalasynyń 20 jyldyǵyna oraı Mádenıet jáne sport mınıstrliginiń tapsyrysy boıynsha «Kazakh Tourism» ulttyq kompanııasy Qazaqstannyń eń mańyzdy tabıǵı nysandary boıynsha ekspedısııa uıymdastyrmaq.
Jańa týrıstik baǵyttardy qalyptastyryp, tabıǵı, tarıhı, kıeli mekenderdi zertteý men ishki týrızm men ınfraqurylymdy damytýdy kózdegen ekspedısııa 2018 jylǵy 18 shilde men 29 qyrkúıek aralyǵynda 6 baǵyt boıynsha 6 týrıstik klasterdi qamtı otyryp, mańyzdy tabıǵı nysandarǵa barý arqyly ótkiziledi. Baǵyttar: «Tıan-Shan marjany» – Almaty oblysy; «Altaı – órkenıet besigi» – Shyǵys Qazaqstan oblysy; «Jońǵar Alataýy» – Almaty oblysy; «Saryarqa» – Aqmola, Pavlodar, Qaraǵandy, Qostanaı oblystary; «Teńizden teńizge deıin» – Qyzylorda, Aqtóbe, Mańǵystaý oblystary; «Jańa Jibek joly» – Túrkistan, Jambyl, Almaty oblystary.
«Biz qazaqstandyqtardyń týǵan jerimizdi, ata-babamyzdyń murasyn tanýǵa qyzyǵýshylyǵy artyp kele jatqanyn baıqap júrmiz. Elimizdiń tabıǵaty erekshe – munda taý da, jazyq ta, kól de, ózen de bar. Sondyqtan biz Altaıdan Jibek jolyna deıingi aralyqty qamtıtyn ekspedısııany uıymdastyryp otyrmyz. Kásibı mamandardan quralǵan top elimizdiń eń tartymdy jerlerin aralap, olar týraly qazaqstandyq jáne sheteldik týrısterge baıandaıtyn bolady. Sonymen qatar sol jerlerdegi týrızmdi ári qaraı damytý úshin qajetti ınfraqurylymdyq sheshimderdi tabýǵa múmkindik beredi», – dep atap ótti «Kazakh Tourism» UK» AQ basqarma tóraǵasy Rashıd Kúzembaev.
Ekspedısııaǵa 140-qa jýyq adam qatysady. Olardyń qataryna kásibı gıdter men tájirıbeli saıahatshylar, jýrnalıster, trevel-blogerler, sondaı-aq depýtattar men medıa tulǵalar kiredi. «Jańa Jibek joly» baǵyty boıynsha National Geographic Reseı toby da qatysady. «Ekspedısııa osy sársenbide bastalady, árkimniń osy joldan dámesi baryna senimdimin. Basty mindet – aldymyzda 6 aımaqty týrısterge jańa qyrynan tanystyrý. Biz jańa áserge bólenip, jańalyqtardy ashý úshin shetelge shyǵýdyń qajeti joq ekenin kórsetkimiz keledi, sebebi elimizdiń tarıhyna qatysty eń mańyzdy da qyzyqty jerlerdiń barlyǵy óz elimizde ornalasqan», – deıdi Kazakh TV telearnasynyń dırektory Sandýǵash Rahymjanova.
Ekspedısııa nátıjesinde elimizdiń tabıǵı nysandary týraly jańa týrıstik baǵyttar, sapaly foto jáne vıdeobankter qurylady, olardyń qazirgi kúıi týraly ózekti aqparat alynady.
Sonymen qatar ekspedısııa barysynda qamtylǵan tabıǵı nysandar boıynsha ıllıýstrasııalanǵan jolnusqa jasalatyn bolady. Ekspedısııa barysy BAQ betteri men áleýmettik jelilerde keńinen kórsetiledi. Ekspedısııa quramyna týrıstik nysandarǵa barý nátıjesi boıynsha arnaıy televızııalyq baǵdarlama jasaýdy josparlap otyrǵan «Kazakh TV» telearnasynyń túsirilim toby kirdi. Keıbir baǵyttaryna «Habar-24» arnasyndaǵy «Jeruıyq» baǵdarlamasynyń túsirilim toby qosylatyn bolady. Ekspedısııanyń resmı medıa-seriktesi – «Habar» agenttigi.
Baǵashar TURSYNBAIULY, «Egemen Qazaqstan»