Aýyl mektepterinen 30 oqýshy IQanat baǵdarlamasy boıynsha halyqaralyq JOO-ǵa bilim granttaryn utyp aldy.
Baǵdarlamanyń maqsaty – aımaqtardaǵy mektep oqýshylaryn qoldaý men ulttyq jáne sheteldik joǵary oqý oryndarynda bilim alýǵa yntalandyrý. IQanat tuńǵysh ret osyndaı iri deńgeıde ótkizilýde. Olımpıadanyń irikteý kezeńi jyl boıy júzege asyryldy. 9, 10-synyp oqýshylarynyń ishinde eń úzdik dep tanylǵandary elordadaǵy olımpıadanyń aqtyq máresine joldama alǵan. Grant ıegerleriniń Kıpr, Lıtva, Qytaı, Reseı, Qazaqstandaǵy 10 joǵary oqý ornynda bilim alýǵa múmkindikteri bar.
Olımpıadaǵa Shyǵys Qazaqstan oblysynyń 6 aýdanynan mektep oqýshylary qatysty. Saıys 5 túrli baǵytta ótti: matematıka, fızıka, aǵylshyn tili, «Erýdıt» esse jazý konkýrsy, jeńil atletıka. Baq synaǵan 1500 úmitkerdiń ishinen sýyrylyp shyqqan 177 oqýshy Astanaǵa keldi.
Baǵdarlamanyń bastamashysy Aıdyn Rahımbaev:
«Bul baǵdarlamaǵa qazaqstandyq bıznesmender qoldaý kórsetedi. Bul jerge eń myqty, eń qabiletti balalar jınaldy. Biz Bilim jáne ǵylym mınıstrligimen jáne «Bolashaq» baǵdarlamasymen kelisim jasadyq. Oqýshylar sertıfıkattar men dıplomdarǵa qol jetkizgen soń, mektepti támamdaǵansha eki jyl arnaıy baǵdarlama aıasynda daıyndyqtan ótetin bolady», dep atap ótti.
Birinshi oryn ıelengen oqýshylar granttan bólek, ózi bilim alyp jatqan mektepti jabdyqtaýǵa 2 mln teńge utyp aldy. IQanat baǵdarlamasynyń uıymdastyrýshylary bul qarjyǵa Fab Lab qurylǵysyn ornatpaq. Bul – robot-tehnıka boıynsha qurylǵylar men 3D-prınterler.
Fınalıster elordada ýaqyttaryn tıimdi ótkizdi. Jańa dostar taýyp, elordanyń kórikti jerlerin, murajaılaryn tamashalady, tabysty adamdardyń trenıngterine qatysty. Zaısan aýdanynan kelgen Qalamqas Seıtpakova Astanany erekshe unatqanyn aıtty.
«Astanada bolǵan 5 kúnde keremet áserge bólendim. Barlyq uıymdastyrýshyǵa zor alǵysymdy bildiremin. Olımpıadaǵa kelgen jolymnyń ózi qyzyq pen qıynshylyqqa toly boldy. Olımpıada bastalmastan biraz ýaqyt buryn jol apatyna ushyradym. Baldaqpen júrsem de saıysqa mindetti túrde qatysamyn dep bekindim. О́zgelerge qaraǵanda maǵan qıynyraq bolsa da qazir ózimdi naǵyz jeńimpaz sezinemin. Olımpıadaǵa aǵylshyn tili páninen qatysyp, sheteldik ýnıversıtetke grant jáne mektepti jabdyqtaýǵa 3 mln teńge utyp aldym», deıdi ol.
Bıylǵy jyly aqtyq básekege tek Shyǵys Qazaqstan oblysynyń aýdandarynan oqýshylar qatyssa, kelesi jyldan bastap Qostanaı, Aqmola, Aqtóbe, Túrkistan oblystarynyń oqýshylary da qatysady dep josparlanýda. Uıymdastyrýshylar ózge de mesenattar men oqý oryndaryn IQanat baǵdarlamasyn qoldaýǵa shaqyrady. Búgingi tańda ony Dáýren Jaqsybek, Aıdyn Rahymbaev, Baýyrjan Isabaev, Armanjan Baıtasov, Islambek Saljanov, Serik Tólbasov, Rústem Itemırov, Serjan Jumashov esimdi azamattar qoldady.
Samal MURAT