Kókshetaýda kórme sırek ótedi. Qylqalam ustaǵandar az. Sondyqtan da ár kórmeden jyl kelgendeı jańalyq izdeımiz. Taıaýda oblystyq tarıhı-ólketaný mýzeıinde «Rýhanı jańǵyrý» baǵdarlamasy aıasynda Qazaqstan Respýblıkasy Kórkemóner akademııasynyń korrespondent-múshesi, KSRO jáne Qazaqstan Sýretshiler odaǵynyń múshesi Dýlat Qospanovtyń jeke kórmesi uıymdastyryldy.
Jergilikti qylqalam sheberi, keskindemeshiniń kórmesine qoıylǵan týyndylarynyń árqaısysynyń astarynda ózindik fılosofııalyq maǵyna bar. «Dala», «Altyn adam», «Abylaı han», «Qanjyǵaly Bógenbaı», «Qanaı bı», «Kókshetaý», «Oqjetpes» kartınalary el tarıhynan syr shertip tur. «Joryq aldynda...» atty týyndysynda Abylaı han men Buqar jyraý, Qarakereı Qabanbaı, Qanjyǵaly Bógenbaı, batyr Baıan beınelenip, kórermenniń kóz aldyna san ǵasyrlar sorabyn ákeledi. Bul týyndy respýblıkalyq katalogqa engen.
Sýretshi Dýlat Qospanovtyń týyndylary Qazaqstan Respýblıkasynyń Ulttyq mýzeıinde, Qazaqstan Respýblıkasy Kórkem kórmeler basqarmasynda, Qytaı, Reseı, Amerıka, Japonııa, Germanııa, Baltyq eli Lıtvada, elimizdiń basqa da qalalaryndaǵy galereıalar men jeke adamdar qorynda saqtaýly.
Sýretshiniń ózindik qoltańbasy bar. Onyń tarıhı týyndylary adamdy qııal qanatynda sóz jetkizsiz ǵajaıyp óner álemine jeteleı túskendeı. Ǵumyr jolynyń qyryq jylyn óner salasyna arnaǵan aıtýly sýretshiniń qylqalamynan týǵan týyndylar keler urpaqqa rýhanı azyq bolary anyq.
Baıqal BAIÁDIL, «Egemen Qazaqstan»
KО́KShETAÝ