Densaýlyq saqtaý mınıstrliginiń bastamasymen respýblıka kóleminde ótip jatqan «Salamatty ádetter marafonyna» atyraýlyqtardyń da qyzyǵýshylyqtary joǵary. Densaýlyq saqtap, uzaq ómir súrýge úndeıtin shara bes kezeńnen turady: adam aǵzasyna zııany bar tuzdy kúndelikti tutynýdy azaıtý, táýligine 2 lıtr sý ishý, 10 000 qadam jaıaý júrý, jemis-jıdekter paıdalaný, jazataıym jaǵdaıǵa tap bolǵanda jasalatyn is-áreketterdi bilý.
Qalalyq №7 emhana men Atyraý medısına kolledji, salamatty ómir saltyn qalyptastyrý ortalyǵy birlesip uıymdastyrǵan marafon medısına qyzmetkerleriniń fleshmobymen bastaldy. Retro saıabaqta jasalǵan «Densaýlyq qalashyǵynda» turǵyndar qan qysymdaryn, qandaǵy qant pen holesterın mólsherin tegin ólsheýge múmkindik aldy.
– Marafon talaptaryn ár turǵyn óz deńgeıinde jalǵastyryp otyrýy kerek. 8 qyrkúıekte materıaldar respýblıkaǵa joldanady. Barlyq erejelerdi buljytpaı oryndaǵan qatysýshylarǵa arnaıy syılyqtar bar, – deıdi Salamatty ómir saltyn qalyptastyrý ortalyǵynyń basshysy Alýa Syralıeva.
Paıdasynan zııany kóp gazdy sýsyndardy, asa tátti, tym ashy tamaqtardy tutynbaı, taza sý iship, jemis-jıdek paıdalanýdyń mańyzy zor. Marafonnyń maqsaty – sportpen shuǵyldanyp, durys tamaqtanýdy ár adamnyń kúndelikti ádetine aınaldyryp, ómir sapasyn arttyrý. Al atyraýlyqtardyń qandaı nátıje kórsetetini qyrkúıekte belgili bolady.
Baqytgúl BABASh, «Egemen Qazaqstan»
ATYRAÝ