Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Jeńis Nurǵalıev pen Ekonomıkalyq saıasat, ınnovasııalyq damý jáne kásipkerlik komıtetiniń múshesi Edil Mamytbekov Tashkent qalasynda ótken «Demokratııalandyrý jáne saıası júıeni jańǵyrtý jaǵdaıyndaǵy zań shyǵarý jáne parlamenttik baqylaý: О́zbekstan tájirıbesi» atty halyqaralyq dóńgelek ústel otyrysyna qatysty.
Sharaǵa birqatar elderdiń parlamentshileri, sarapshylar, túrli memlekettik organdardyń, halyqaralyq uıymdardyń jáne buqaralyq aqparat quraldarynyń ókilderi qatysty.
Dóńgelek ústeldiń maqsaty zań shyǵarýdyń halyqaralyq tájirıbesin talqylaý, atqarýshy organdardy parlamenttik baqylaýdy taldaý jáne О́zbekstanda júzege asqan reformalardyń tıimdiligin qarastyrý boldy.
Sharaǵa qatysýshylar zań shyǵarý qyzmetiniń qazirgi zamanǵy ádisteri men qaǵıdattary, memlekettik basqarý júıesindegi saıası partııalardyń róli men orny, Qazaqstan, AQSh, Ulybrıtanııa, Germanııa, Italııa, Japonııa, Kanada jáne basqa elderdegi parlamenttik baqylaý tájirıbesin salystyrmaly taldaý týraly baıandama jasady.
J.Nurǵalıev óz sózinde dóńgelek ústelge qatysýshylardy elimizdiń qoǵamdyq-saıası jáne áleýmettik-ekonomıkalyq jańǵyrtý jónindegi Elbasy Nursultan Nazarbaevtyń bastamasymen tanystyrdy. Depýtat Qazaqstannyń ishki saıasatynyń negizgi baǵyttary, negizgi strategııalar men baǵdarlamalyq qujattary týraly aıtyp berdi.
J. Nurǵalıev prezıdenttik ókilettiginiń bir bóligin bıliktiń atqarýshy jáne zań shyǵarýshy tarmaqtaryna berý týraly Memleket basshysy bastamasynyń mańyzyna toqtala kelip, Qazaqstan Parlamentiniń qyzmeti týraly habardar etti. Atap aıtqanda, dóńgelek ústelge qatysýshylar bizdiń elimizde júzege asqan konstıtýsııalyq reforma jaıynda tanystyryldy, onyń nátıjesinde Parlamenttiń baqylaý mindetteri arta túskeni jáne áleýmettik-ekonomıkalyq saıasatty júzege asyrý men eldiń jaı-kúıine Úkimettiń jaýapkershiligi kúsheıtilgeni aıtyldy.
Dóńgelek ústelge qatysýshylar talqylanǵan máselelerge kózqarastary uqsas ekenin aıta kelip, kópjaqty parlamentaralyq yntymaqtastyqty jalǵastyrýdy jaqtady.