Kolledjder men joǵary oqý oryndarynyń stýdentteri arasynda ótken ıntelektýaldyq saıysqa 4 top qatysty. Saıys jastardyń boıynda sybaılas jemqorlyqqa qarsy mádenıetti qalyptastyryp, memlekettik qyzmetke qatysty málimetterdi stýdentter men mektep oqýshylaryna túsindirý maqsatynda uıymdastyryldy.
Ashylý rásiminde sóz alǵan QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysynyń orynbasary Qaırat Báıgebaev óz sózinde jemqorlyqty azaıtpaıynsha, eldiń áleýmettik-ekonomıkalyq ilgerileýi ekitalaı ekenin jetkizdi.
Merıtokratııa degenimiz ne, memlekettik qyzmetshiniń ádebi jáne minez-qulyq normalary, memleket tarapynan kórsetiletin qyzmetter, sybaılas jemqorlyqtyń aldyn alýǵa qatysty saýaldarǵa jastar jarysa jaýap berdi.
Intelektýaldy saıys 3 kezeńdi qamtydy. Aldymen suraq-jaýap kezeńi, odan keıin «Kapıtandar saıysy» bolsa, úshinshi kezeń «Sýretter sóıleıdi» dep atalady. Alǵashqy kezeńde tarıhı tanym, ensıklopedııalyq bilim men memlekettik qyzmetke qatysty suraqtar keldi. Ekinshi kezeńde komanda kapıtandary ortaǵa shyǵyp óz biliktilikterin pash etse, úshinshi kezeńde túrli logıkalyq sýretter kórsetilip onyń mán-mazmuny aıtyldy.
Jastar arasynda tuńǵysh ret ótkizilip otyrǵan saıys aldaǵy ýaqytta dástúrli túrde uıymdastyrylyp turmaq.
Gúlaıym ShYNTEMIRQYZY, «Egemen Qazaqstan»