Semeıde 8-synyp oqýshylaryna jańadan kirgiziletin «Din taný negizderi jáne zaıyrlylyq» kýrsy talqylandy.
Qazaqstanda sońǵy kezderi kóshede betterin páránjimen jaýyp, qara kıinip júretin nemese mektep jasyndaǵy qyz balalarǵa oramal taqtyratyn kórinister oryn alyp otyrǵany ras. Elimizde dindi oqyp, úırenýge, ustanýǵa eshqandaı tyıym salynbaǵan. «Árkim ata-babasynan qalǵan dindi qurmetteýge quqyly. Desek te, zaıyrly damý baǵytyn ustanǵan qoǵamda ómir súrip otyrǵandyqtan túrli ulttar men ulystardyń kózqarasyn, qazaq halqynyń tarıhı ereksheligin de eskergen jón», deıdi Semeı qalasy ákiminiń orynbasary Nadejda Sharova.
Qala ákimi orynbasarynyń aıtýynsha, 2009 jyldyń 1 qyrkúıeginen bastap mektepterde «Dintaný» negizderi páni kirgizilgen. Al «Dintaný negizderi jáne zaıyrlylyq» kýrsy Qazaqstanda jáne álemde oryn alyp otyrǵan jaǵdaılarǵa baılanysty endi qolǵa alynyp otyr. Bul áli kámeletke tolmaǵan, oń men solyn aıyra almaıtyn mektep jasyndaǵy oqýshylardyń ekstremızm men terrorızm baǵytyna ketip qalmaýy úshin beriletin sapaly bilim sanalady.
Semeı qalalyq bilim bóliminiń basshysy Natalııa Fesenkonyń aıtýynsha, 8- synyp oqýshylaryna jańadan engiziletin kýrstyń oqýlyqtaryn oblystyq Din isteri basqarmasy usynǵan kitaptar tolyqtyratyn bolmaq. Sabaq ústinde osy basqarma bekitken kitaptar ǵana paıdalanylatyn bolady.
– Sabaq barysynda elimizdegi barlyq din tarıhy tolyq oqytylady, – dedi N.Fesenko. Taqyryptar mýltımedııalyq kabınetterde ótkiziledi. Muǵalimder dinı terrorlyq uıymdardyń kimderden turatyndyǵyn, olardyń qaýiptiligin oqýshylarǵa baǵyt-baǵdar berý arqyly túsindirý kerek. Oqýshylarǵa tapsyrma beriledi. Olar óz betterimen úırenip, izdenip, BAQ arqyly nemese oqýlyqtar arqyly kózqarastaryn keńeıtýleri qajet. Osylaısha olar ózderin jáne týystary men joldastaryn teris dinı aǵymdardan saqtanýdyń joldaryn úırenedi. Jańa kýrs mine, osy úshin asa qajet.
Raýshan NUǴMANBEK,
jýrnalıst
SEMEI