Shekara, shekarashy týraly kitap joqtyń qasy. Ásirese elimiz táýelsizdik alǵan sońǵy 27 jyldyń kóleminde týǵan eliniń shekarasyn kózderiniń qarashyǵyndaı kúzetip kele jatqan shekarashylardyń Otan aldyndaǵy mindeti, jańa patrıottardy tárbıeleıtin tynys-tirshilikteri jaıly eńbek tapshy desek, artyq aıtqandyq emes.
Shekara, shekarashy týraly sol shekarany adaqtap, shekarashylardyń arasynda jıi bolatyn áskerı tilshiler jaqsy biledi. Sosyn da óziniń sanaly ǵumyryn shekaraǵa arnap, sonyń jolynda ózin aıamaıtyn, týǵan Otanynyń qasıetti shebin naǵyz jaýjúrek batyrdaı qorǵap, aıalap, ardaqtaıtyn búgingi kúnniń batyrlary – elimizdiń shynaıy patrıottary ǵana shekarashy jýrnalısterge shabyt syılap, qalamyna qýat bitiredi. Sondyqtan UQK Shekara qyzmetiniń baıyrǵy tilshisi, zapastaǵy podpolkovnık Tamara Dáýletbaevanyń «Shekara soqpaqtary» atty týyndysy elimizdegi áskerı-patrıottyq taqyryptarda jaryq kórip, qalyń jurtshylyq jyly qabyldap jatqan ádebıet darııasyna tamǵan tamshy sekildi.
Elimizdegi joǵary bilim ordalarynyń ishindegi shoqtyǵy bıik ál-Farabı atyndaǵy Qazaq ulttyq ýnıversıtetiniń túlegi áskerı jýrnalısterdiń qataryn tolyqtyryp, shekarashylardyń gazetinde úzilissiz eńbek etip kele jatqan Tamara Qýanyshbekqyzy óziniń bul kitabynda «Meniń shekarashylarmen birge qyzmet jasasyp kele jatqanyma 20 jyldan asyp barady. Osy jyldar ishinde baıqaǵanym, «shekara» – olar úshin qasterli, qasıetti. Máselen, úıirinen úzilip bólek, oqshaý júrer erkin minezdi jylqyny qazaqtar «saıaq» deıdi. Maǵan shekarashy sol saıaq arǵymaq sekildi bolyp kórinip turady. О́ıtkeni shekarashy mamandyǵyn tańdaý – kez kelgen adamnyń mańdaıyna jazylmaǵan. Myńnyń ishinen bireýi bolýy múmkin...», dep shekarashylarǵa ózgeshe baǵa beredi.
Osynyń ózi-aq áskerı tilshiniń shekarashylarǵa – elimizdiń jańa patrıottaryn tárbıeleý isine orasan zor úles qosyp kele jatqan shekara saqshylaryna degen kóńiliniń alabóten ekenin aıqyn bildirgen. О́ıtkeni bizdiń áriptesimizdiń qolyna qalam aldyryp, ádebı shyǵarmasynyń arqaýyna aınalǵandar – jeldiń ótinde ómir súrip kele jatqandar. Sanaly ǵumyrlaryn shekaraǵa arnaǵan sardarlar men «Otan qorǵaýshy» mamandyǵyn enshilegen jas ofıserler. Sosyn da syrtqy kelbet-kórkemdigi jaǵynan bolsyn, ishki maǵyna-mazmuny turǵysynan da bul kitap shekarashylar úshin de, olardyń el shebindegi jas dostary – bolashaq shekara qorǵaýshylar úshin de erekshe basylym bolyp shyqqany haq.
Asqar BATYRBEKOV