Túrkistan oblysynda satyp alý quqyǵynsyz jalǵa beriletin 73 kópqabatty turǵyn úı salynýda. Bıýdjet esebinen boı kóterip jatqan úılerde barlyǵy 2449 páter bolady. Bıyl onyń 500-i, ıaǵnı 35 turǵyn úı paıdalanýǵa beriledi. Bul týraly búgin Túrkistan oblystyq óńirlik kommýnıkasııalar qyzmetinde ótken brıfıngte Qurylys basqarmasynyń basshysy Quttybek Jamashev málim etti.
Oblys ákimdiginiń baspasóz qyzmetinen málim etkendeı, budan ózge, turǵyn úıler salynyp jatqan aýdandarda memleket qarajaty esebinen 9 nysannyń qurylysy júrgizilýde.
Eske salsaq, Túrkistan qalasynyń bas josparyn qaıta ázirleý boıynsha aǵymdaǵy jyldyń 12 shildesinde halyqaralyq konkýrs jarııalanǵan bolatyn.
«Qaıta ázirlengen bas josparǵa sáıkes, «Turǵyn úı qurylysyn damytý» tujyrymdamasy bekitiletin bolady. Túrkistan oblysynyń ákimi Janseıit Túımebaevtyń ıdeıasy boıynsha Túrkistan qalasyn túrki áleminiń rýhanı-mádenı ortalyǵy retinde damytý maqsatynda jańadan salynatyn kópqabatty úıler Qoja Ahmet Iаsaýı kesenesinen bıik bolmaıdy. О́ıtkeni - mavzoleı múmkindiginshe qalanyń barlyq jaǵynan kórinýi qajet. Salynatyn baspanalar Orta Azııalyq stılde, ıaǵnı kóne dáýirdegi sáýletpen salynady», - dedi Quttybek Rahmattýllauly.
QR Úkimetiniń 22.06.2018 jylǵy № 372 qaýlysymen bekitilgen «Nurly jer» memlekettik turǵyn úı baǵdarlamasy aıasynda osy jyly Túrkistan oblysy úshin turǵyn úıdi paıdalanýǵa tapsyrý jospary 344,7 myń sharshy metr bolyp belgilengen. 2018 jyldyń 6 aıynyń qorytyndysy boıynsha, 202,4 myń sharshy metr turǵyn úı paıdalanýǵa berilip, ótken jyldyń osy merzimimen salystyrǵanda 30 paıyzǵa artqan.
Oblysta 2018 jyly qarjylandyrýdyń barlyq kózderi arqyly 79 kópqabatty turǵyn úıdiń qurylysy júrgizilýde. Jyl qorytyndysymen 35 úı paıdalanýǵa beriledi. Qurylys jumystarynyń naqty kólem ındeksi boıynsha 2018 jyldyń jospary - 140,8 mlrd teńge. Bul meje alty aıdyń qorytyndysy boıynsha 117,8 paıyzǵa oryndaldy.