Qazaqstandyqtar 2020 jyldyń 1 qańtarynan bastap jeke múlki men kirisi týraly jylyna bir ret esep berýge mindetti. Bul týraly keshe Úkimettiń baspasóz ortalyǵynda Qarjy mınıstrliginiń Memlekettik kirister komıteti tóraǵasynyń orynbasary Madı Taqıev málimdedi.
Onyń aıtýynsha, elimizdiń árbir azamaty menshigindegi múlikterdi, onyń ishinde páterler, kólikter, banktegi salymdaryn kórsetýi tıis. Atalǵan deklarasııany aldymen, kámelet jasqa tolǵan Qazaqstannyń barlyq azamattary, onyń ishinde oralmandar men Qazaqstanda turýǵa ruqsat qaǵazy barlar, ekinshiden, múlki nemese múlikte ıa baǵaly qaǵazdarda úlesi bar kámelettik jasqa tolmaǵandar, úshinshiden, el aýmaǵynda múlki bar sheteldikter toltyrady.
− Úıińizde saqtap otyrǵan qolma-qol qarajatyńyzdyń barlyǵyn kórsetesiz. Eger soma 500 AEK-ten asyp ketse (shamamen 12 mln teńge) bankten shot ashyp, sol jerge aqshańyzdy salýǵa tıissiz. Iаǵnı bankte osyndaı kólemde aqsham bar dep kórsetýińiz qajet. Al kámeletke tolmaǵandar úshin olardyń ata-analary, bolmasa qamqorshylary JSN arqyly deklarasııa kórsete alady. Al qarjyny qaıdan alǵanyńyzdy rastaý kerek emes. Aldaǵy ýaqytta ózimiz monıtorıng júrgizemiz, – dedi Taqıev.
Aldyn ala boljam boıynsha, 2020 jyly Qazaqstanda shamamen 12 mln 900 myń adam deklarasııa toltyratyn bolady. Onyń ishinde 7,4 mln adam − qala turǵyndary jáne 5,5 adam − aýyl turǵyndary bolady dep kútilýde. Deklarasııany toltyrýdyń eki merzimi bekitilgen, ıaǵnı qaǵaz júzinde esep bergisi kelgender 15 shildege deıin, al elektrondy túrde deklarasııa toltyratyndarǵa 15 qyrkúıekke deıin ýaqyt berilmek. Ári qaraı jyl saıyn «№260 formadaǵy» qysqasha deklarasııany eńbekaqy alatyn stýdentter, zeınetkerler men azamattar toltyrady.
Aıta keterligi, elimizde buǵan deıin de memlekettik qyzmetkerler jyl saıyn tapqan tabysy men mal-múlki jaıynda esep berýdi daǵdyǵa aınaldyrǵan. О́tken jyly memlekettik qyzmetkerler toltyrǵan deklarasııada 1000-nan asa kemshilik esepke alynyp, onyń ishinde sotqa jiberilgenderi de bar.
Jappaı deklarasııalaý aldymen eldegi jemqorlyqtyń aldyn alsa, ekinshi kezekte kóleńkeli ekonomıkadaǵy qarjy aınalymynyń tamyryna balta shappaq. Bul rette ofshorly aımaqtaǵy shetel asqan qarajattardyń da elge qaıtarylýyna naqty qadamdar jasalady.
Erkejan AITQAZY,
«Egemen Qazaqstan»