Mańǵystaý oblysy boıynsha Ekologııa departamentinde sybaılas jemqorlyqtyń aldyn alyp, memlekettik qyzmetshilerdiń ádep normalaryn saqtaý máseleleri kóterildi.
Memlekettik qyzmet salasyn baqylaý basqarmasynyń basshysy Nurbol Doldashev óz baıandamasynda memlekettik qyzmetti tańdaǵan adamnyń qoǵamǵa úlgi bolýy qajettigine erekshe toqtaldy. «Memlekettik qyzmetshige qoıylar talap joǵary. Ádep keńesinde biz memlekettik qyzmetshilerge qatysty túrli jaıttardy qarastyramyz. Sizderdiń aldaryńyzǵa kelip túsindirý jumystaryn júrgizýimizdiń negizgi maqsaty – qorqytyp, úrkitý emes, túrli bolyp jatqan qıturqy áreketterdi mysal retinde aıta otyryp, bolýy yqtımal keleńsiz jaıttardyń aldyn alý. Ádep keńesi memlekettik qyzmeshilerdi aıyptap, jazaǵa tartýdy maqsat tutpaıdy. Máseleniń anyq-qanyǵyna kózin jetkizip baryp sheshim shyǵarady. Kináli bolmaǵan jaǵdaıda, negizsiz aıyp taǵylǵan kezderde memlekettik qyzmetshiniń quqyǵyn qorǵaımyz, dedi Nurbol Amangeldiuly.
Sybaılas jemqorlyq profılaktıkasy basqarmasynyń bas mamany Shyńǵys Ibraev 2015-2025 jyldarǵa shaqtalǵan Sybaılas jemqorlyqqa qarsy strategııanyń maqsat-mindetteri týraly egjeı-tegjeıli baıandap berdi.
«Qazaqstan álemdik qaýymdastyqtyń jaýapty múshesi retinde jemqorlyq dertiniń aldyn alýǵa basa mán beredi. Qazirgi kúni tájirıbe kórsetip otyrǵandaı profılaktıkalyq jumystar neǵurlym jıi júrgiziletin elderde paraqorlyq faktileri az. Sondyqtan biz kúndelikti 4-5 ujymmen kezdesýler ótkizemiz, dedi Shyńǵys Maratuly.
Aıta keteıik, Mańǵystaý oblysy boıynsha Ekologııa departamentiniń negizgi mindetteri – jobalarǵa memlekettik ekologııalyq saraptama jasaý, tabıǵat paıdalanýshylarǵa qorshaǵan ortaǵa emıssııaǵa ruqsat berý, qorshaǵan ortanyń quramdas bólikterine zerthanalyq taldaý-baqylaý júrgizý bolyp tabylady.
Departament qaýipti qaldyqtardyń pasportyn tirkeý, memlekettik ekologııalyq saraptama qorytyndysyn berý jáne qorshaǵan ortaǵa emıssııaǵa ruqsat berý baǵytynda qyzmet etedi.
Sondaı-aq, ekologııalyq zańnamalardyń saqtalýy, tabıǵat qorǵaý sharalarynyń oryndalýyna, tabıǵat paıdalanýshylardyń jaǵdaılaryna jáne tártip buzýshylylyqtardy túzetýge bergen eskertpelerdi oryndaýyna baqylaý jasaıdy.
Sondyqtan da bul saladaǵy jemqorlyqtyń aldyn alýǵa QR memlekettik qyzmet isteri jáne sybaılas jemqorlyqqa qarsy is-qımyl agenttigi erekshe kóńil bóledi.
Gúlaıym ShYNTEMIRQYZY, «Egemen Qazaqstan»