Búgin Qazaqstan Respýblıkasynyń Syrtqy saýda palatasy Aýǵanstan ıslam respýblıkasynyń Kabýl qalasyndaǵy KabulStar otelinde Qazaqstan men Aýǵanstannyń resmı ókilderiniń qatysýymen saýda-ekonomıkalyq mıssııasy ótkizildi dep habarlady.
Qazaqstandyq bıznes ókilderi Aýǵanstanǵa taǵam, ónimderi, energetıkalyq, qurylys-montaj ben jóndeý-servıs salalarynan barǵan. Aýǵan tarapynan sol baǵyttaǵy 40-tan astam kompanııa qatysty.
Atap aıtqanda, aýǵan kompanııalary qazaqstandyq óndiris ishinen un, makaron ónimderi, transformator jáne taǵy da basqa taýarlardyń ımportyna qyzyǵýshylyq tanytyp otyr.
Saýda-ekonomıkalyq mıssııanyń resmı delegasııasyn Qazaqstan Respýblıkasynyń Aýǵanstandaǵy Elshisi Álimhan Esengeldıev, Aýǵanstannyń aýyl sharýashylyǵy mınıstriniń orynbasary men Energetıka jáne sý resýrstary mınıstriniń orynbasary basqardy.
Bul sharany uıymdastyrýǵa Qazaqstan Respýblıkasy Investısııalar jáne damý boıynsha mınıstrligi, Qazaqstan Respýblıkasynyń Aýǵanstan Elshiligi, «Atameken» kásipkerlerdiń ulttyq palatasy, Qazaqstannyń Syrtqy saýda palatasy, Aýǵanstan saýda-óndiris palatasy muryndyq boldy.
Aınash ESALI, «Egemen Qazaqstan»