Qyzylorda oblysynyń aýyl sharýashylyǵy basqarmasynyń bastamasy boıynsha aýylsharýashylyq ónimderin, tuqymdardy, aýyl sharýashylyǵy tehnıkalaryn, tyńaıtqyshtardy, hımııalyq zattardy satyp alýǵa, satýǵa nemese aıyrbastaýǵa jáne qyzmetterdi paıdalanýǵa bolatyn «Agrobırja» ınternet-resýrsy qurylǵan.
Agrobırja jobalyq basqarý sheńberinde iske qosyldy. Aýyl sharýashylyǵy vıse-mınıstri Gúlmıra Isaevanyń aıtýynsha, Qyzylorda oblysynda Agrobırja qurý tájirıbesi barlyq óńirlerge usynylady.
Qyzylorda oblysynyń aýyl sharýashylyǵy basqarmasynyń bastyǵy Baqyt Jahanovtyń aıtýynsha, kóbinese taýar óndirýshiler naryqqa tikeleı qol jetkize almaıdy. О́ndirilgen taýarlardy qaıda, kimge jáne qaı baǵada satylatyndyǵynyń belgisizdigi tek aımaqta ǵana emes, respýblıkada da sheshilmegen problemalardyń biri bolyp tabylady.
«Azyq-túlik taýarlary baǵasynyń ósýine yqpal etetin faktorlardyń biri – deldaldardyń kóptigi ekeni eshkimge jasyryn emes, sarapshylardyń pikirinshe olar 65-85% quraıdy. Bul burmalanǵan baǵa men baǵany negizsiz kóterýge alyp keledi, al taýar óndirýshilerdiń ózi az paıdaǵa qanaǵat etedi. Osy maqsatta biz «Agrobırja» aýylsharýashylyq ónimderiniń saýdasyna arnalǵan elektrondy platforma qurdyq. Ol satylym naryǵyn keńeıtýge, satyp alýshy men satýshy arasyndaǵy tikeleı baılanystardy ornatýǵa, eksporttyq operasııalardy arttyrýǵa múmkindik beredi», - deıdi Bahyt Jahanov.
Esterińizge salaıyq, www.agrosauda.kz veb-saıtyndaǵy aqparat qazaq, orys, aǵylshyn jáne qytaı tilderinde usynylǵan. Bolashaqta oǵan parsy tilin de qosý josparlanýda. Aıta keteıik, qyzylordalyq agrarlar óz ónimderin eksporttaıtyn elderdiń biri - Iran.
Qazirgi ýaqytta ınternet-resýrstaryn jetildirý jumystary jalǵasýda, jaqyn arada «Agrobırja» mobıldi qosymshasy iske qosylatyn bolady.