Oblys ákimi Berdibek Saparbaev Parlament Májilisiniń óńirde jumys saparymen júrgen bir top depýtattarymen kezdesti. Kezdesýge Gleb Shegelskıı, Sergeı Sımonov, Danııa Espaeva, Magerram Magerramov, Narıne Mıkaelıan, sonymen qatar, oblystyq máslıhat hatshysy Sánııa Qaldyǵulova qatysty.
О́ńir basshysy májilis depýtattaryna oblystyń aǵymdaǵy jyldyń birinshi jarty jyldyǵyndaǵy áleýmettik-ekonomıkalyq damýy men memleket basshysy tapsyrmasyn oryndaý aıasyndaǵy jetistikteri týraly málimdedi.
– Munaı óndirý kóleminiń tómendeýine qaramastan bizdiń oblystaǵy ekonomıka ósimi 5,1 paıyzdy qurady, barlyq negizgi áleýmettik-ekonomıkalyq kórsetkishter byltyrǵydan joǵary. Bul bizde belgili bir rezervter bar degen sóz. Biz shıkizattyq emes salalardy ártaraptandyrýǵa jáne damytýǵa basa nazar aýdaramyz. Osy jyldyń qorytyndysy boıynsha memleket basshysynyń ekonomıka ósimin 4-5 paıyzǵa jetkizý tapsyrmasyn qamtamasyz etemiz dep senemin, – dedi Berdibek Saparbaev.
Sondaı-aq, oblys ákimi depýtattarǵa densaýlyq saqtaý, bilim berý, sport, turǵyn úı-kommýnaldyq sharýashylyǵy salalarynyń damýy jaıly jete aıtyp berdi.
О́z kezeginde Májilis depýtattary Aqtóbe oblysynyń damý qarqynyna joǵary baǵa berip, turǵyndarǵa kóptegen jańa áleýmettik nysandardyń salynǵanyn jáne ashylǵanyn atap ótti.
Budan basqa, suhbattastar Prezıdenttiń bes áleýmettik bastamasynyń, memlekettik jáne salalyq baǵdarlamalardyń Aqtóbe oblysynda júzege asyrylýyna qatysty birqatar suraqtardy talqylady.
Temir Qusaıyn
«Egemen Qazaqstan»
Aqtóbe