Búgin Úkimet úıinde QR Premer-Mınıstri Baqytjan Saǵyntaevtyń qatysýymen Básekege qabilettilik jónindegi saraptama keńesiniń otyrysy ótti, dep habarlaıdy primeminister.kz.
Kezdesý barysynda eldiń básekege qabilettiligin arttyrýdyń negizgi faktorlarynyń biri retinde Qazaqstanda týrızm salasyn damytý máseleleri talqylandy.
«Globalink Logistics Group» bas dırektory Sıdık Han, «Masterconcept Consulting GmbH» kompanııasynyń prezıdenti Gernot Leıtner jáne «Alina» kompanııalar tobynyń prezıdenti Erlik Balfanbaev keńeske qatysýshylardyń nazaryna «Ile Alataýy» taý shańǵysy týrıstik klasterin damytý jobasyn, týrızmdi damytýdyń qazirgi jaǵdaıynyń taldaýyn usyndy jáne osy salada Qazaqstannyń múmkindikterin iske asyrý boıynsha usynystar jasady.
Mádenıet jáne sport vıse-mınıstri Erlan Qojaǵapanov qazirgi ýaqytta Memleket basshysynyń tapsyrmasy boıynsha Úkimet týrızmdi damytýdyń memlekettik baǵdarlamasynyń jobasyn ázirlep jatqanyn jáne osy proseske sarapshylardyń qatysýy ázirleýshiler úshin óte mańyzdy ekenin atap ótti. Baǵdarlamada ınfraqurylymdyq jáne marketıngtik máselelerdi, týrısterge arnalǵan memlekettik qoldaý jáne qaýipsizdik sharalaryn qarastyrý kózdelgen. Jobalardy memlekettik-jekeshelik seriktestik aıasynda iske asyrý josparda bar.
Saraptama keńesi músheleriniń pikirinshe, elimizdiń áleýeti jyldyń barlyq tórt maýsymynda Qazaqstandy týrıstik oryn retinde damytý úshin jetkilikti túrde joǵary. Tabıǵı klımattyq jaǵdaılar jaǵajaılyq ári taý shańǵysy demalys oryndaryn damytýǵa múmkindik beredi. Týrısterdiń ártúrli sanattary úshin ystyq kún, qum jáne kólder, Kaspıı teńizi bar, onymen qosa qar, shańǵy, túrli taý oıyndary, mýzyka, fılmder men festıvaldar, tabıǵat, dalalar, ekotýrızm, qymbat emes ishki týrızm, saýyqtyrý ortalyqtary, baı mádenıet pen murany zertteý múmkindigi de bar.
Budan ózge, otyrys barysynda pikirtalastarǵa «Sentras» kompanııalar tobynyń bas dırektory E.Ábdirazaqov, «Resmi kompanııalar toby» AQ dırektorlar keńesiniń tóraǵasy Q.Májibaev, CentrAsia Group dırektorlar keńesiniń tóraǵasy A.Qudaıbergen, «Arman Holding» kompanııasynyń prezıdenti S.Bısekeev jáne t.b. qatysty.