Kún tártibinde aýyldyq eldi mekenderdi sýmen qamtamasyz etý máseleleri talqylandy. Semınarǵa Qyzylorda oblysynyń ákimi Qyrymbek Kósherbaev, QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev, QR Qarjy, Investısııalar jáne damý mınıstrlikteriniń, «Qazsýshar» RMK jáne ózge de memlekettik organdarynyń ókilderi qatysty.
Aımaq basshysy Elbasy 2011 jyly Qazaqstan halqyna arnaǵan Joldaýynda 2020 jyly aýyldyq eldi mekenderdiń 80 paıyzyn ortalyqtandyrylǵan aýyz sý júıesine qosý jóninde tapsyrma bergenin atap ótti. Soǵan sáıkes 2011-2020 jyldarǵa arnalǵan "Aq bulaq" baǵdarlamasy qabyldanyp, budan keıin birqatar salalyq baǵdarlamalar yqshamdalyp, 2020 jylǵa deıingi О́ńirlerdi damytý baǵdarlamasyna biriktirildi. 2015 jyly qabyldanǵan "Nurly jol" baǵdarlamasy arqyly eskirgen aýyz sý júıesin jańǵyrtý jumystary asa qarqyndy júrgizildi.
«Atalǵan baǵdarlamalar aıasynda Qyzylorda oblysynda maqsatty ári júıeli jumystar atqarylýda. Atap aıtsaq, 2011-2017 jyldar aralyǵynda bıýdjetten 40 mlrd.teńgeden astam qarjy tartyldy. Sonyń nátıjesinde 2,5 myń shaqyrymǵa jýyq aýylishilik jáne servıstik júıeler jańartyldy, 8,5 myńnan astam sý ólshegish quraldary ornatyldy. Búgingi kúni oblystaǵy 265 aýyldyq eldi mekenniń 199-y nemese 76,5 paıyzy ortalyqtandyrylǵan aýyz sý júıesine qosylǵan. Halyq sanyna shaqqanda, 97 paıyzdy quraıdy», - dedi oblys ákimi.
Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishevtiń aıtýynsha, qazirgi tańda respýblıka boıynsha ortalyqtandyrylǵan aýyz sýmen qamtý kórsetkishi 57,4 paıyzdy quraıdy. Sonymen qatar, sheshimin áli tappaǵan taǵy da birqatar problemalyq másele bar. Máselen, aýyldyq eldi mekenderdi sýmen qamtý jáne sýdy burý jónindegi Biryńǵaı operatordy qurý máselesi ózekti máseleleriniń biri bolyp tabylady.
«Bárimizge belgili, Qazaqstan Respýblıkasy Premer-Mınıstri B.A. Saǵyntaevtyń 2017 jylǵy 22 qarashadaǵy №11-3/07-623 Hattama qaýlysymen Aýyl sharýashylyǵy mınıstrligine sýmen jabdyqtaý jáne sýdy burý júıeleri fýnksııalaryn berý máselelerin jáne «Qazsýshar» RMK usynatyn biryńǵaı operatordy qurý týraly máseleni qarjylandyrý kózderin anyqtaý tapsyryldy», - dedi Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev.
Sondaı-aq, komıtet tóraǵasy ortalyq deńgeıde Biryńǵaı operatordy qurý máselesi oń sheshimin tapsa, jergilikti jerde bul máseleni keıbir aımaqtar ǵana qoldaǵanyn aıtty.
Atap ótken jón, Qyzylorda oblysynda respýblıkada alǵashqylardyń biri bolyp 2017 j. 1 maýsymynan bastap Fılıal negizinde sýmen qamtý jáne sýdy burý jónindegi Biryńǵaı operatory quryldy. Atap aıtqanda, jergilikti sýmen qamtý júıeleri kommýnaldyq menshikten respýblıkalyq menshikke, ıaǵnı «Qazsýshar» RMK «Aral» ODSP fılıalynyń teńgerimine berildi.
Semınar-keńes barysynda Qyzylorda oblysynyń tájirıbesi týraly oblys ákiminiń orynbasary Serik Súleımenov baıandap berdi.
«Oblysta sýmen qamtý jónindegi Biryńǵaı operatordy qurý tarıhy 2012 jyly bastaldy. Atap aıtqanda, respýblıkada alǵashqylardyń biri bolyp 2017 j. 1 maýsymynan bastap Fılıal negizinde sýmen qamtý jáne sýdy burý jónindegi Biryńǵaı operatory jumysyn bastady. Biryńǵaı operatordy qurý sýdy sońǵy tutynýshyǵa jiberý boıynsha qyzmetterdi tıimdi, sapaly ári júıeli ótkizýge ári qurylǵylardy paıdalaný jáne jóndeý jumystaryn óz kúshimen júzege asyrýǵa múmkindik beredi», - dedi Serik Súleımenov.