Astanadaǵy «Barys-Arena» saraıynda Qazaqstannyń eńbek sińirgen sport sheberi, Sochı Olımpıadasynyń qola júldegeri Denıs Tenmen qoshtasý rásimi ótti.
Azamattyq janazaǵa memlekettik organdardyń basshylary jáne basqa da ókilderimen qatar sportshylar, Denıstiń dos-tanystary keldi. Olar jyly estelikterimen bólisti.
Qaraly jıynǵa qatysqan Aqparat jáne kommýnıkasııalar mınıstri Dáýren Abaev Qazaqstannyń maqtanyshynan aıyrylyp qalýymyz bárimizge sabaq ekenin aıtty.
«Bul kúni Denıstiń jaqyndaryna kóńil aıtýǵa da sóz tabý qıyn. Bul úlken qaıǵy jáne barlyǵymyz úshin sabaq boldy. Mundaı qatelikke endi jol bermeý kerek. Qosh bol jáne bizdi keshir, Denıs», - dedi D.Abaev.
Denıs Tenmen qoshtasýǵa arnalǵan azamattyq janaza elimizdiń barlyq óńirlerinde ótip jatyr. Al sportshyny aqtyq saparǵa attandyrý rásimi Almatyda ótti.