Búgin QR Premer-Mınıstri Baqytjan Saǵyntaev «Sıfrlyq Qazaqstan» memlekettik baǵdarlamasyn iske asyrý máseleleri boıynsha AT-qaýymdastyq ókilderimen kezdesý ótkizdi, dep habarlaıdy Premer-Mınıstrdiń baspasóz qyzmeti.
Kezdesý barysynda ekonomıkany sıfrlandyrý men qazaqstandyq AT-qaýymdastyqty damytýdyń aýqymdy jumystarynyń negizgi kezeńderi talqylandy. Atap aıtqanda, «Astana Hub» AT-startaptardyń halyqaralyq tehnoparkiniń ınnovasııalyq klasterin qurý, otandyq kadrlardy daıarlaý, aqparattyq qaýipsizdik, AT-startaptar úshin ınnovasııalyq granttar bólý, sondaı-aq otandyq AT-qyzmetterdiń eksporttyq áleýetin qoldaý jáne otandyq AT-kompanııalardyń qyzmetterine kedergi keltiretin tosqaýyldardy joıý sekildi máselelerge erekshe nazar aýdaryldy.
Bıznes-qaýymdastyq ókilderi otandyq sıfrlyq ındýstrııany damytý týraly ózderiniń kózqarastarymen bólisip, sondaı-aq ózderiniń usynystary men qyzyǵýshylyq tanytatyn máselelerin aıtty. Máselen, búgingi tańda AT-mamandaryn taýarlardy, jumystardy jáne qyzmetterdi memlekettik satyp alý rásimderin jeńildetý, otandyq AT-kompanııalardy memlekettik qoldaý, MJÁ tetikterin jetildirý, elektrondyq kommersııany yntalandyrý, AT-kompanııalar arasynda básekelestikti damytý, sonymen qatar, sıfrlyq ekonomıka daǵdylaryn damytýǵa baǵyttalǵan bilim berý júıesin jańǵyrtý máseleleri tolǵandyrady.
Kezdesý barysynda QR Premer-Mınıstriniń orynbasary A. Jumaǵalıev, aqparat jáne kommýnıkasııalar mınıstri D. Abaev, qarjy vıse-mınıstri R. Eńsebaev sóz sóıledi.
Kezdesýdiń qorytyndysy boıynsha QR Premer-Mınıstri Baqytjan Saǵyntaev 20 otandyq AT-kompanııanyń múmkindikteri týraly prezentasııalyq stendtermen tanysty.
Eske sala keteıik, Memleket basshysy «Qazaqstannyń úshinshi jańǵyrýy: jahandyq básekege qabilettilik» joldaýynda sıfrlandyrýdy damytý jóninde birqatar tapsyrmalar bergen edi.
«Sıfrlyq ındýstrııany damytý basqa barlyq salalarǵa serpin beredi. Sondyqtan Úkimet AT salasyn damytý máselesin erekshe baqylaýda ustaýǵa tıis. Jańa ındýstrııalar qalyptastyrýdyń mańyzdy sharty ınnovasııalardy qoldaý jáne olardy óndiriske tezirek engizý bolyp sanalady», — delingen Joldaýda.