Investısııalar jáne damý mınıstri Jeńis Qasymbek halyq aldyndaǵy eseptik kezdesýiniń qorytyndysy retinde baspasóz konferensııasyn ótkizdi. Mınıstrdiń aıtýynsha, Indýstrııalandyrý baǵdarlamasy óńdeý sektorynyń damýyna oń áser etkenin kórsetip otyr.
«Bıylǵy birinshi jartyjyldyqta óńdeý sektory ótken jyldyń sáıkes kezeńimen salystyrǵanda 5,2%-ke ósti. Indýstrııalyq damýdyń negizgi kórsetkishteri boıynsha da oń dınamıka baıqalyp otyr. Bıylǵy qańtar-aqpan aılarynda bul kórsetkish 2017 jyldyń sáıkes kezeńimen salystyrǵanda 22,1%-ke artyp, 2,5 mlrd AQSh dollaryna jetti. 2018 jyldyń qańtar-maýsymynda óńdeý ónerkásibine salynǵan ınvestısııa kólemi 18,2%-ke ósip, 532,8 mlrd teńgeni qurady», dep atap ótti J.Qasymbek.
Indýstrııalandyrý bastalǵaly beri (2010-2017jj.) barlyǵy 6,6 trln teńge bolatyn 1148 joba iske qosylyp, 107 myń turaqty jumys orny ashyldy. Bıyl jalpy somasy 850 mlrd teńge bolatyn 123 jobany iske qosý josparlanyp otyr. Onda 14 myńnan astam jumys orny ashylatyn bolady. Vedomstvo basshysynyń aqparaty boıynsha, bıylǵy 1-toqsanda tikeleı sheteldik ınvestısııanyń jalpy aǵyny 6,7 mlrd dollardy qurap, 24,4%-ke ósti.
«Indýstrııalandyrý baǵdarlamasy aıasyndaǵy salalar ınvestısııa úshin tartymdy bolyp keledi. Tikeleı sheteldik ınvestısııa qurylymynda óńdeý ónerkásibiniń úlesi shamamen 3 ese ósti. Negizgi kapıtalǵa salynǵan ınvestısııalardyń jalpy kólemi 2018 jyldyń 6 aıynda 4,5 trln teńgeni qurady. Bul ótken jyldyń sáıkes kezeńimen salystyrǵanda 25,8%-ke artyq. Biz 59 mıllıard dollardan asatyn 658 ınvestısııalyq jobanyń negizgi tizbesin qurdyq, bul 2020 jylǵa deıin júzege asyrylady», dedi ınvestısııalyq jobalar týraly aıtqan mınıstr.
Qurylys salasynda bıyl 12,1 mln sharshy metr turǵyn úıdi nemese 103 myńnan astam baspanany paıdalanýǵa berý josparlanyp otyr. Turǵyn úı qurylysyna 513,3 mlrd teńge ınvestısııa salyndy. Bul ótken jylǵydan 28,4%-ke joǵary. Respýblıka boıynsha 49 667 baspana paıdalanýǵa berildi, onyń ishinde 20 532 jeke úı bar.
«Memleket basshysynyń bastamasy boıynsha ıpotekany odan ári damytý jáne tólem qabileti bar halyqty qoldaý maqsatynda «7 – 20 – 25» jańa ıpotekalyq nesıelendirý baǵdarlamasy engizildi. Tómen paıyzdy ıpoteka jańa qurylystan baspana alýǵa beriledi. Ulttyq banktiń deregi boıynsha bıyl 4 shildeden bastap kredıttik komıssııanyń qaraýyna ótinishter túse bastady. Búginde 148 ótinish joldanyp, 1,1 mlrd teńge bolatyn 95 ıpotekalyq kredıtti berý maquldandy», dep habarlady mınıstr J. Qasymbek.
Elimizdiń kólik salasy da ósim dınamıkasyn kórsetip otyr. Barlyq kólik túrlerimen júk tasymaldaý kólemi 6,4%-ke ósip, 1,8 mlrd tonnany qurady. 6 aıdyń qorytyndysy boıynsha tranzıttiń jalpy kólemi 8,5 mln tonnaǵa jetti. Bul 2017 jyldyń (7,8 mln tonna) sáıkes kezeńindegi kórsetkishten 9%-ke artyq. Konteınerlik tasymal kólemi 206 myń konteınerdi qurap, ótken jyldyń sáıkes kezeńimen salystyrǵanda 40%-ke artty (2017 jyldyń 1 jartyjyldyǵynda – 148 myń JFE). Sonyń ishinde Qytaı – Eýropa – Qytaı baǵyty boıynsha atalǵan kórsetkish 101 myń konteınerge jetti. Bul 38%-ke artyq (73,1 myń JFE). Azamattyq avıasııa salasynda jolaýshylar aǵynynyń turaqty ósim qarqyny saqtalýda. 2018 jyldyń 6 aıynda tasymaldanǵan áýe jolaýshylarynyń ósimi 19%-ti nemese 3,8 mln adamdy qurady (2017 jyly 3,2 mln adam). Halyqaralyq baǵyttarǵa ushý geografııasy keńeıýde.
«Byltyr 10 jańa halyqaralyq áýe qatynasy ashyldy. Bıyl jyl basynan beri 12 halyqaralyq marshrýt ashyldy. Onyń ishinde qazaqstandyq áýe tasymaldaýshylar Atyraý – Frankfýrt, Astana – Qazan, Astana – Túmen, Astana – Vılnıýs, Astana – Chelıabi, Astana – Krasnodar, Astana –Tom, Astana – Sochı baǵyttaryn oryndaıdy. Sondaı-aq sheteldik tasymaldaýshylar oryndaıtyn Rıga – Almaty («AirBaltic»), Novosibir – Pavlodar («Sıbır»), Krasnoıar – Almaty («Angara»), Máskeý – Qyzylorda («Aeroflot») jańa áýe marshrýttary ashyldy», dep atap ótti J.Qasymbek.
Raýan Qaıdar,
«Egemen Qazaqstan»