Jaqynda Aqtóbe oblysynyń ákimi Berdibek Saparbaev bastaǵan delegasııa Qaraqalpaqstan astanasy Nókis qalasyna baryp qaıtty. Qaraqalpaqtyń uly shaıyry Berdaq eskertkishine gúl qoıýdan bastalǵan sapar Qaraqalpaqstan Respýblıkasy Joǵarǵy keńesiniń tóraǵasy Musa Ernııazovtiń qabyldaýyna ulasty. Onda óńirler arasyndaǵy ekonomıkalyq, mádenı baılanystardy nyǵaıtý joldary talqylandy. Sonymen qatar oblys ákimi Berdibek Saparbaev pen Qaraqalpaqstan Respýblıkasy Mınıstrler keńesiniń tóraǵasy Qaharman Sarıev 2018-2020 jyldarǵa arnalǵan ózara yntymaqtastyq jáne saýda-ekonomıka salasy boıynsha áriptestik memorandýmyna qol qoıdy.
Sondaı-aq eki el kásipkerleri arasynda ótken bıznes-forýmda taraptardyń múmkindikteri barynsha saralanyp, naqty sharalar qabyldandy. Atap aıtqanda, kórshiler Bozoıdaǵy burynǵy ótkizý pýnktin qaıta ashyp, joldy jóndep, Besqalanyń arzan kókónisin Aqtóbe arqyly Reseıge, tipti ári qaraı Eýropaǵa shyǵarýǵa múmkindik alady. Ári Aqtóbeden et, un ónimderin tasıdy.
Táýelsizdik jyldary Aqtóbe oblysyna kóship kelgen 42 920 adamnyń 36 220-sy О́zbekstannan, al onyń 90 paıyzy Qaraqalpaq elinen qonys aýdarǵandar. Qazir olar ósip-ónip, 42 260 adamǵa jetip otyr. Sapar barysynda Berdibek Saparbaev jergilikti qazaqtarmen kezdesip, «Nurly kósh» baǵdarlamasy týraly jan-jaqty baıandady. Aqtóbe oblysyna kóship kelýshilerge barynsha qamqorlyq kórsetiletinin atap ótti.
Osy rette Berdibek Mashbekuly Q.Jubanov atyndaǵy Aqtóbe memlekettik ýnıversıteti Qaraqalpaqstandaǵy qandastarymyzdyń balalaryn oqýǵa jeńildikpen qabyldaýǵa daıyn ekendigin tilge tıek etti. Oqýǵa qabyldanǵan stýdentter 1-kýrsta tolyqtaı oqý aqysyn tóleýden bosatylady. Qalǵan kýrstardy 50% jeńildikpen oqıdy. Sondaı-aq qaraqalpaqstandyq túlekterdiń jol shyǵynyn qysqartý úshin qujattar Nókiste qabyldanady.
Kezdesý sońynda Qaraqalpaqstandaǵy qazaq ulttyq mádenıet ortalyǵyna «Aqtóbe – qutty meken» kitaby, A.Jubanov týraly kitaptar, «100 jańa oqýlyq» aıasynda shyǵarylǵan oqýlyqtar, tanymdyq kitaptar syıǵa tartyldy. О́ıtkeni Qaraqalpaqstandaǵy 725 mekteptiń 171-i qazaq tilinde oqytady. Sapar sońynda delegasııa Nókistegi Sorsha qorymynda jatqan qazaqtyń uly aqyny Tólegen Aıbergenovtiń basyna baryp, duǵa baǵyshtady.
Bazarbaı IMANOV,
Dúnıejúzi qazaqtary qaýymdastyǵy Aqtóbe oblysy fılıalynyń basshysy