Túrkııanyń Ystambul qalasynda grek-rım kúresinen Anadoly eliniń maqtan tutar azamattary Vehbı Emre men Hamıt Kaplannyń memorıaly ótti. 36 márte jalaýy jelbiregen jarysta 25 memleketten kelgen balýandar beldesti.
Dúbirli dodada Qazaqstannyń balýandaryna bes júlde buıyrdy. Jerlesterimizdiń arasynan asyǵy alshysynan túsken Aıdos Sultanǵalı altyn tuǵyrǵa kóterildi. 60 kılo salmaqta kúsh synasqan qandasymyz bastapqy básekelerde ázerbaıjandyq Hasan Mammadáli men japonııalyq Shımısý Haıanobýdy jeńip, jartylaı fınaldy bolgarııalyq Avgýstın Spasovqa san soqtyrdy. Fınalda Aıdos Moldovanyń ókili Vıktor Kıobanýdy qapy qaldyrdy.
55 kıloda Janserik Sársenbıev pen Qorlan Jaqansha qola medaldi moıyndaryna ildi. Úshinshi oryn úshin tartysta Janserik Brazılııanyń týy astynda óner kórsetip júrgen qazaqtyń uly Marat Ǵaripovten basym tússe, Qorlan jergilikti balýandy jyqty. Sondaı-aq Ibragım Magomedov (72 kılo) men Tamerlan Shadýkaev (77 kılo) aıtýly jarystyń qola júldegeri atandy.
Vehbı Emre men Hamıt Kaplannyń memorıalynyń komandalyq esebinde Túrkııa quramasy top jardy. Jarys qojaıyndary tórt salmaq dárejesi boıynsha dara shyqty. Olar – Ekrem О́ztúrik (55 kılo), Murat Fırat (67 kılo), Fatıh Keńgiz (77 kılo) jáne Rıza Kaıalp (130 kılo). Taǵy eki salmaqta belarýssııalyq Pavel Lıah (72 kılo) pen Sergeı Starodýbtyń (97 kılo) baǵy jandy. Sonymen qatar, ázerbaıjandyq Taleh Mammadov (63 kılo), grýzııalyq Lasha Gobadze (82 kılo) jáne ýkraınalyq Jan Belenıýk (87 kılo) bas júldeni qanjyǵasyna baılady.
Ǵalym SÚLEIMEN,
«Egemen Qazaqstan»