Astana qalasynyń qoǵamdyq kólikterindegi jolaqy tólemine ózgeris engizildi. Bul jańashyldyq elordadaǵy jolaýshy tasymaldaýshylar júıesinde elektrondy jolaqy tóleminiń engizilýine baılanysty týyndap otyr. Astana qalasy ákimdiginiń habarlaýynsha, jańa júıe boıynsha jolaqy tóleminiń eki túri qarastyrylǵan. Endi elordanyń turǵyndary men qonaqtary qoǵamdyq avtobýstarda kólik kartasyn paıdalana alady nemese bir ret beriletin jol júrý bıleti úshin aqshalaı tólem jasaıdy. Iаǵnı elektrondy jolaqy tólemi júıesin engizý barysynda jolaýshylardyń jolaqy qunyn aqshamen tóleý quqyǵy da saqtalǵan.
Osyǵan oraı sońǵy kúnderi astanalyq qoǵamdyq kólikti paıdalanýshylar arasynda birqatar túsinbestik jaǵdaılar týyp otyrǵany jasyryn emes. Máselen, bul jańashyldyqtan beıhabar jolaýshylardyń avtobýs kondýktorlaryna dúrse qoıa bergenin nemese aldyn ala aqparattandyrý jumystaryn júrgizbeýine baılanysty shaǵymdanyp jatqanyn qoǵamdyq kólikti paıdalanýshylar jıi baıqaıdy. Iаǵnı úırenshikti jolaqy quny 90 teńgeni usynǵan jolaýshylardan astanalyq kondýktorlar taǵy 90 teńge ústemeleýin ótinedi. О́ıtkeni qaltańyzda elektrondy karta bolmasa, aqshalaı jolaqy quny eki esege kóteriledi. Bul rette aldyn ala halyqtyń arasynda habarlandyrý, qulaqtandyrý jumystarynyń jetkilikti júrgizilmeýi baıqalady deıdi shaǵymdanýshylar.
Al Astana qalasynyń ákimi Áset Isekeshev jaz maýsymy aldynda jolaqy quny ózgermeıtinin, tek jol júrý kartochkasyn qoldanýdy qalamaıtyndar úshin saralanǵan tarıf retinde 180 teńgelik tólemaqy qarastyrylyp otyrǵanyn jetkizgen-di. Qala ákimi Astanada 2014 jyldan beri jolaqy qunynda ózgeris bolmaǵanyn, jańa saralanǵan tólemaqy júıesin engizý aldynda tóleý keńselerin kóbeıtý baǵytynda jumys júrgizilip jatqanyn atap ótken bolatyn.
Elektrondy jolaqy tólemi kartasynyń jaramdylyq merzimi – 5 jyl, kepildik ýaqyty – 2 jyl. «Kólik ámııanyna» toltyrylǵan tarıfty paıdalaný ýaqytyna shekteý joq.
Jýyrda Astanada qoǵamdyq kólikte saralanǵan tarıfti engizý taqyrybynda «Astana LRT» JShS brıfıng te ótkizgen bolatyn. «Astana LRT» JShS basqarma tóraǵasy Bekmyrza Igenberdınovtiń aıtýynsha, saralanǵan tarıfti engizýdiń maqsaty – qoǵamdyq kólik salasyndaǵy kóleńkeli aqsha aınalymyn túpkilikti joıý, bıýdjet túsimin molaıtý jáne qalanyń kólik júıesin odan ári damytýǵa kóbirek qarajat bólýdi kózdeıdi. Astana qalasy ákimdiginiń saralanǵan tarıf týraly qaýlysy negizinde kólik kartasy arqyly tólemaqy daǵdyly qalalyq baǵdarlarda – 90, ekspress qalalyq baǵdarlarda – 180, qala mańy baǵdarlarynda 1 shaqyrym úshin 8 teńge mólsherinde belgilense, aqshalaı tóleý kezinde daǵdyly qalalyq baǵdarlarda – 180, ekspress qalalyq baǵdarlarda – 250, qala mańy baǵdarlarynda 1 shaqyrym úshin 11,5 teńge kóleminde belgilendi. Sonymen qatar qaýlyǵa sáıkes, jolaqyny tóleýdiń elektrondyq júıesi istemeı qalǵan jaǵdaıda jolaqyny kólik kartasymen tóleıtin jolaýshynyń tegin jol júrýge quqyǵy bar. Endi kólik kartasyn paıdalanatyn jolaýshylarda alǵashqy valıdasııa jasaǵan sátten bastap 60 mınýt ishinde bir ret tegin aýysyp otyrý múmkindigi bolady. Buryn tegin aýysyp otyrý sany shekteýsiz bolǵany belgili.
Buryn qalada kólik kartalaryn satyp alý men toltyrýǵa arnalǵan 6 mamandandyrylǵan kassa jáne 30 RTVM-avtomat jumys istegen bolatyn. Endi paıdalanýshylar jol aqysyn Qiwi termınaly arqyly tóleı alady. Taıaý ýaqytta www.transcard.kz saıty arqyly jáne kaspi.kz ınternet-bankıngi arqyly tólem jasaý múmkindigi qoljetimdi bolmaq.
Bekmyrza Igenberdınovtiń aıtýynsha, kondýktorlardyń bir bóligi qoǵamdyq kólik salasynda jumysyn jalǵastyra beredi. «Kásiptik sheberligin kórsetken kondýktorlar Kóliktik baqylaý departamentine jumysqa shaqyryldy. Bul departament qoǵamdyq kólik salasyndaǵy tártip buzýshylyqtardy anyqtap, joıýdy júzege asyrady. Sonymen qatar kondýktorlardyń bir bóligi avtoparkterdiń baqylaý-jelilik qyzmetine aýysady. Al taǵy bir bóligi avtobýstarda jolaqy tóleýdiń elektrondy júıesiniń jumysy jónindegi keńesshi bolyp jumys isteıtin bolady», deıdi ol.
Bul tarıftik ózgeristerdiń qalalyq máslıhat bekitken jeńildigi bar azamattarǵa qatysy joq. Iаǵnı «Azamattarǵa arnalǵan úkimet» memlekettik korporasııasynyń «Áleýmettik tólemderdi vedomstvoaralyq esepteý ortalyǵynda» esepte turǵan azamattar, máselen, zeınetkerler, asyraýshysynan aıyrylý jaǵdaıyna jáne jasyna baılanysty memlekettik áleýmettik tólemaqy alýshylar, kópbalaly analar, kópbalaly otbasylar, múgedekter, 18 jasqa tolmaǵan múgedek balalar, Uly Otan soǵysynyń qatysýshylary men múgedekteri jáne oǵan teńestirilgen tulǵalar ataýly kólik kartasyn paıdalana alady.
Jalpy, kólik kartasyn qalaı paıdalanýǵa bolady? Atobýsqa kirgende jolaýshy elektrondy kartany arnaıy termınal-valıdatorǵa qoıady. Qadaǵalaýshy jolaýshydan tekserý úshin valıdasııa úderisin qaıtalaýdy suraýǵa quqyly. Al «Aılyq jolaqy» tarıfin engizý úshin kartany valıdatorǵa qoıyp, 3-5 sekýnd ustap turý jetkilikti. Mindetti túrde valıdator ekranyndaǵy «Toltyrý. Ok» habarlamasyn kútý kerek. Budan keıin qaıtalaý barysynda «Valıdasııa» habarlamasy shyǵýy tıis. Osy úderisten soń ádettegideı paıdalana berýge bolady.
Sondaı-aq Astanada 7 jastan 15 jasqa deıingi balalar mekteptik kólik kartasyn ala alady. Oqýshylardyń jolaqy quny 40 teńgeni quraıdy. Olar kólik kartasyn ózderi oqıtyn oqý ornynan alady. Kartany resimdeý úshin týý týraly kýáligi men fotosýreti qajet. Alǵashqy karta tegin beriledi. Al joǵalǵan jaǵdaıda qaıta shyǵartý 400 teńge turady. Mektep kartasy jeke oqýshyǵa arnalatyndyqtan, kelesi adam paıdalana almaıdy. Eger mektepte kartany resimdeýden bas tartsa, ata-anasy nemese qamqorshysy Qajymuqan kóshesindegi №14 úıde ornalasqan tóleý júıesi departamentine habarlasýyna bolady. Ol ózimen birge ata-ananyń biriniń jeke kýáligin jáne balanyń týý týraly kýáliginiń túpnusqasy men qujattyq fotosýretin ala kelýi qajet. Mundaı kartany qalaǵa kelgen basqa oqýshylar da qoldana alady.
Jalpy qala ákimdigi bul jobanyń sýbsıdııalaýdy durys esepteý maqsatynda engizilgenin aıtady. Sebebi qala ákimdigi tasymaldaýshylardyń jeńildikpen júretin jolaýshylardy tasymaldaý shyǵynynyń bir bóligin óteıdi. Al elektrondy jolaqy kartasy júıesi men valıdatorlar avtoparktiń qansha jolaýshy tasymaldaıtynyn naqty kórsetedi. Sonymen birge jolaýshylar aǵynyna da naqty taldaý jasaýǵa múmkindik beredi. Munyń nátıjesinde jańa baǵdarlar engizilip, suranysqa ıe baǵdarlar boıynsha tıisti jumys júrgiziledi.
Al búginde tólem kartalarynyń tehnıkalyq aqaýlaryna baılanysty oryn alyp jatqan keıbir kemshilikter túzetilýde.
Dýman ANASh,
«Egemen Qazaqstan»