Nur Otan Trends-te «Sıfrly Qazaqstan» máselesi talqylandy

Oǵan «Nur Otan» partııasy Tóraǵasynyń birinshi orynbasary Máýlen Áshimbaev, Aqparat jáne kommýnıkasııalar vıse-mınıstri Dınara Sheglova, «Atameken» UKP Aqparattyq-kommýnıkasııalyq tehnologııa­lar, bilim berý jáne ınnovasııalar komıtetiniń tóraǵasy Bolat Basheev jáne sıfrlandyrý salasynyń bilikti mamandary qatysty.

Sıfrlandyrý taqyryby Qa­zaq­stan úshin ótkir ári mańyzdy taqyryp ekeni bárimizge aıqyn. Sol sebepti «Sıfrly Qazaqstan» tujyrymdamasy negizinde qa­byldanǵan is-sharalardy júzege asyrý kezinde týyndaǵan má­selelerdi sheshý úshin salany jetik meńgergen mamandarmen jıi pikir almasýdy jón kórdik. Búgin partııa usynǵan erkin pikirtalas alańynda Qazaqstandy sıfr­landyrý máselesin talqylap qana qoımaı, mamandar tarapynan naqty sheshimder men usy­nystar kútemiz, degen Máýlen Áshimbaev sıfrlandyrýdyń eń­bek ónimdiligi men jumys sapasyn arttyryp, jalpy kez kelgen ónimdi shyǵarý barysynda kezdesetin qıyndyqtardyń aldyn alýǵa kómektesetinin jetkizdi. Sondaı-aq eger elimizde sıfrlan­dyrý boıynsha mindettelgen má­seleler men josparlanǵan joba­lar tolyqqandy júzege assa, qa­zaq­standyqtar qoldanatyn mem­lekettik jáne jekemenshik qyzmet túrleri artyp, jańa ká­sip­­oryndar ashylmaq. «Nur Otan» partııasy da sıfrlandyrý jo­basynyń tezirek júzege asýy­na múddeli. Osy oraıda par­tııa bastamasymen Qazaqstan boıyn­sha qolǵa alynǵan 1000 IT-sy­nyp baǵdarlamasy týraly aıta ketý kerek. Búginde ár oblys­tan ashylǵan bul baǵ­dar­lamalar ar­qyly jas jetkin­shek­terge 3 D modeldeý, baǵdar­la­ma­laý ne­giz­deri, robottytehnıka fa­kýlta­tıvtik negizde tereńdet­ip úıre­tilýde. Sondaı-aq «Nur Otan» par­tııasy keleshekte «Ata­meken» UKP-men birige otyryp, ár aımaq­tar­dan sala mamandaryn da­ıyn­daıtyn 20 IT-ortalyq ashýdy kózdep otyr.

Aqparat jáne kommýnıkasııalar vıse-mınıstri Dınara Sheglova sıfrlandyrýdy júzege asyrý boıynsha pılottyq jáne kúndelikti rejimde ashylǵan 120 jobaǵa aralyq baǵa berip ótti. Onyń aıtýynsha, jobalar pılottyq júıede júzege asyrylsa da, olardyń tıimdiligi álden-aq baıqalýda. Sol sebepti olardy ózge aımaqtarda jolǵa qoıý jumystary júrgizilýde.

«Sıfrly Qazaqstan» tu­jy­rymdamasy aıasynda halyqqa paıdaly, ekonomıkaǵa tıimdi kóp­tegen jobalar óziniń júzege asýyn kútýde. Osy oraıda, pikir­talas sońy Qazaqstannyń IT-qaýym­dastyǵy memleketpen, partııamen jumyla, «bir jeńnen qol, bir jaǵadan bas shyǵara otyryp», sapaly mamandar daıyndaýy kerek dep túıindeldi.

Venera TÚGELBAI,

«Egemen Qazaqstan»