Bıylǵy aýa raıynyń jyldaǵydan ózgeshe qubylýy aýyldyń da, aýyldyń jaıyn oılaǵan agrarshy-akademıktiń de kóńil-kúıin ári-sári etkeni ras. Kúndiz jaýyn, túnde sýyq – ne kerek, qapelimde kóktemniń qalaı shyqqanyn sezbegen halyq, mine, jazdyń orta shenine qalaı jetkenin de bilmeı qalyp otyr. Qarǵanyń mıyn qaınatar aptap jazǵy shildeniń túskenin sezdirdi.
Akademık Tilektes Espolovtyń joly Almatynyń irgesindegi ózi maı topyraǵyn bala kezden keship ósken Sýyqtóbe baýraıyna jıi túse de bermeıdi. Suranshy batyr aýylyna belgili ǵalymnyń bul kelýi áp-sátte jańalyqqa aınaldy. El jaıyn, mal-jan amandyǵyn surap, jekemenshik sharýashylyq ıeleriniń isterimen tanysyp, jany jaıdarylanǵan akademık aýyldaǵy aǵaıyndarǵa súıinshi áńgimeniń shetin shyǵardy.
Ústimizdegi jyldyń 6 maýsymynda álemniń úzdik ýnıversıtetteriniń QS WUR-2019 reıtıngi jarııalandy. Reıtıngte Jer sharynyń 2 myńnan asa ýnıversıteti iriktelip, tańdaýly 1 myń joǵary oqý orny arnaıy saraptamadan ótti. Osy saraptamada T.Espolov jetekshilik etetin Qazaq agrarlyq ýnıversıteti TOP-700 irikteý testi boıynsha álemniń úzdik ýnıversıteti ataǵyn aldy. Bıyl oqý ornyn 1314 túlek bakalavrıat boıynsha, sonyń ishinde 320 stýdent úzdik dıplommen bitirdi. Túlekterdiń 85 paıyzy jumysqa ornalasý múmkindigine ıe boldy. Dıplomdy jas mamandar jobalyq júıe boıynsha Qazaqstannyń túkpir-túkpirine attanyp ta ketti. Aıtpaqshy, toqsan jyldyq tarıhy bar bilim shańyraǵynda 90 paıyzdan astam aýyl balalary oqıdy. Aýyl adamdarymen aradaǵy áńgimede akademık bul máselege de basymdyq berýdi umytpady.
Memleket basshysy Nursultan Nazarbaevtyń bıylǵy Joldaýyndaǵy on basymdyqtyń úshinshi baǵytynda: «Agrarlyq saıasat eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtýǵa baǵyttalýy kerek» dep atap kórsetildi. Ǵalym agrarlyq qýatty saıasattyń ǵalamdyq mańyzy men mánisin tyńdaýshylarǵa uǵynyqty tilmen túsindirdi. Aldyn ala josparsyz ótken basqosý aýyl turǵyndaryna unady. Tus-tustan jaýǵan saýaldyń barlyǵyna ǵalym tarapynan naqty jaýap qaıtaryldy.
...Tabıǵat qansha túrlenip, aýa raıy qansha qubylsa da Jer-Ana eńbektengen janǵa jemisin aıamaı bereri anyq. Orta toltyrǵan áńgimeden soń jergilikti sharýa qojalyqtaryn aralaǵan akademık aýyldaǵy maýsymdyq tolaıym eńbektiń tolassyz tasqynyn kórip marqaıdy.
Talǵat SÚIINBAI,
«Egemen Qazaqstan»
Almaty oblysy,
Jambyl aýdany,
Suranshy Batyr aýyly