Búgin Nazarbaev ortalyǵynda mektep oqýshylary arasynda transport salasyndaǵy respýblıkalyq konkýrstyń fınaldyq irikteý týry ashyldy. Konkýrstyń jeńimpazdary Krenfıld ýnıversıtetiniń (Ulybrıtanııa) aerokosmos mektebine taǵylymdamadan ótýge barady, dep habarlaıdy QR Tuńǵysh Prezıdenti – Elbasy Qorynyń baspasóz qyzmeti.
Ekinshi ret ótkeli otyrǵan konkýrstyń maqsaty – kólik salasyna degen qyzyǵýshylyqty arttyrý jáne bilimdi tereńdetý, sonymen qatar oqýshylardyń mamandyqty sanaly túrde tańdaýǵa yntalandyrý.
Elimizde óńirlik irikteý týrlaryn oblys ákimdikteri men Astana, Almaty jáne Shymkent qalalarynyń ákimdikteri ótkizdi. Fınaldyq irikteý kezeńine 85 adam keldi. Ár komanda 4 oqýshydan jáne 1 komanda jetekshisinen turady. Fınaldyq irikteý týryn Astanada 24-26 shilde aralyǵynda Krendfıld ýnıversıtetiniń ókilderi ótkizdi.
Fınaldyq irikteýdiń qorytyndysy boıynsha 40 oqýshy 19-26 tamyz aralyǵynda Krenfıld ýnıversıtetiniń (Ulybrıtanııa) aerokosmos mektebine oqý-tanymdyq saparǵa jiberiledi.
Konkýrsty uıymdastyrýǵa Ádilet mınıstrligi, QR Tuńǵysh Prezıdenti – Elbasynyń Qory men Ulttyq zııatkerlik menshik ınstıtýty, Nazarbaev ýnıversıteti jáne Krenfıll ýnıversıteti de atsalysyp otyr.
Fınaldyń ashý saltanatyna QR Tuńǵysh Prezıdenti – Elbasy Qorynyń atqarýshy dırektorynyń orynbasary Sultan Aıtjanov, Ádilet vıse-mınıstri Natalıa Pan, Ulybrıtanııanyń Qazaqstandaǵy elshisi Maıkl Djon Gıfford, Nazarbaev ýnıversıtetiniń vıse-prezıdenti Erden Qusaıyn qatysyp, sóz sóıledi. Krenfıld ýnıversıtetiniń (Ulybrıtanııa) aerokosmos mektebiniń ókilderi Iаn Hollıngvort aerokosmos dınamıkasy týraly, Frenk Iýkes ushaqtardy modeldeý jaıly, leıtenant – polkovnık Endrıý Hoýlton tikushaq operasııalary týraly áńgime aıtyp berdi.
«Atalǵan konkýrs balalarǵa tehnıkalyq mamandyqtardy durys tańdaýǵa, aǵylshyn tiliniń deńgeıin arttyrýǵa kómektesedi, sondaı-aq álemniń úzdik aerokosmos mektebine barýǵa múmkindik beredi. Bizdiń basty mindetimiz - jas ónertapqyshtarǵa qoldaý kórsetý», - dedi QR Tuńǵysh Prezıdenti – Elbasy Qorynyń atqarýshy dırektorynyń orynbasary Sultan Aıtjanov.