«Batys» óńirlik qolbasshylyǵy áskerı bólimderiniń mańaıynda jáne oqý-jattyǵý polıgondarynda radıasııalyq, hımııalyq jáne bıologııalyq qorǵaý áskerleri bólimderiniń dalalyq jattyǵýlary bastaldy.
Aǵymdaǵy jyldyń 16 shildesi men 3 tamyzy aralyǵynda «Batys» óńirlik qolbasshylyǵynyń oqý-jattyǵý polıgondary men turaqty dıslokasııalaný pýnktteriniń janynda áskerı qyzmetshiler tájirıbe júzinde RHB barlaý, tehnıkany degazasııalaý jáne dezaktıvasııalaý, ýlanǵan aımaqtardan ótý, jyljymaly jáne jyljymaıtyn tútin shymyldyǵyn jasaý boıynsha ózderiniń arnaıy mashyqtylyǵyn arttyrady.
«Batys» óńirlik qolbasshylyǵynyń radıasııalyq, hımııalyq jáne bıologııalyq qorǵaý áskerleriniń bastyǵy polkovnık Ádil Mahambetovtyń aıtýy boıynsha, «Dalalyq jattyǵýlar barysynda RHB barlaý mashınalary men basqa da arnaıy tehnıkalar qoldanylatyn bolady. Sonymen qosa, «Shmel» reaktıvti jaıaý áskerleriniń oq shashqyshynyń atystary josparlanǵan. Shartty túrdegi ýlanǵan aımaqtar anyqtalyp, olardy zalalsyzdandyrý boıynsha arnaıy is-sharalar oryndalyp, jeke quramnyń, áskerı tehnıkanyń jáne qarýdyń arnaıy óńdeý jumystary júrgiziledi. Oqý oryndarynda aerozoldi búrkeý, shartty qarsylastyń naqty dáldeý jáne barlaý quraldaryna qarsy turý boıynsha normatıvterden synaq qabyldanady.
Búgingi kúni, Radıasııalyq, hımııalyq jáne bıologııalyq qorǵaý áskerleriniń basty mindeti - qarsylastyń jappaı joıý qarýyn qoldaný saldarynan radıasııalyq, hımııalyq jáne bıologııalyq qaýipti tómendetý, obektilerdiń qıratylý zardaby men masshtabyn tabý jáne baǵalaý, radıoaktıvti, ýlaǵysh, ýytty zattar men bıologııalyq quraldardan jeke quramdy qorǵaý, áskerler men obektilerdiń kórinýin tómendetý bolyp tabylady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy