Qyzylorda oblysynan О́zbekstan astanasyna endi esh qıyndyqsyz barýǵa bolady.
Eki jaqqa birdeı qolaıly «Qyzylorda-Tashkent-Qyzylorda» turaqty marshrýty ashyldy.
Kúndizgi saǵat beste júretin avtobýstardyń bıleti eresekter úshin 3 myń teńge. Al, jeti men on eki jas aralyǵyndaǵy balalar úshin bir jarym myń teńge turady.
– Eki memleket basshylarynyń kelisimi arqasynda shekara ashylyp, qazaq-ózbek qatynasynyń aıasy keńeıdi. Endi jolaýshylarymyz jaıly zamanaýı avtobýstar arqyly dittegen jerine bara alady, – deıdi «Saltanat» JShS basshysy Baıanbaı Syzdyqov.
Buryn О́zbekstanǵa barý úshin kólik aýystyryp, jarty kún ýaqytyn jolda ótkizetin jolaýshylar qýanýly.
Aıta keteıik, búgingi tańda oblys aýmaǵynda 212 eldi mekendi aýdan jáne oblys ortalyǵymen baılanystyratyn 211 avtobýs marshrýty uıymdastyrylǵan. Sonymen qatar, oblys ortalyǵynan Astana, Almaty, Aqtóbe, Túrkistan, Shymkent, Jezqazǵan, Saryaǵashqa qalaaralyq avtobýstar qatynaıdy.
Baqtııar TAIJAN,
«Egemen Qazaqstan»
Qyzylorda oblysy