Elordamyzdyń 20 jyldyǵyna oraı Semeıge Astanadan arnaıy at aryltyp jetken «Aq tilekpen, Astana» jobasyna qatysýshy qonaqtardy qalalyq Dostyq úıiniń ujymy arnaıy qarsy aldy.
Dostyq úıindegi ardagerler keńesiniń tóraǵasy Keńes Raıymbekov astanalyqtarǵa aq batasyn berdi. «Qazaq tili» halyqaralyq qoǵamynyń soltústik-shyǵys óńiri boıynsha vıse-prezıdenti Oral Sháripbaev, qalalyq Mádenıet jáne tilderdi damytý bóliminiń basshysy Nazerke Aqqojınalarmen birge túrli etnomádenı ortalyqtar ókilderi qonaqtarǵa erekshe iltıpat kórsetip, qazaqy qonaqjaılyqpen Shyǵys Qazaqstan oblystyq Nevzorovtar otbasy atyndaǵy beıneleý óner mýzeıiniń zalynda uıymdastyrylǵan «Aq tilekpen, Astana» atty kórmege shaqyrdy.
Osyndaı aıtýly kórme búgin elimizdiń barlyq oblys ortalyqtarynda ótti. Semeı qalasynda uıymdastyrylǵan kórmede qala ákimi Ermak Sálimov astanalyqtardy qarsy alyp, izgi tilegin jetkizdi.
– Astana Uly Dala eliniń Saryarqasynda ornalasqan, sáýlet pen mádenıettiń ortalyǵy,-dedi qala ákimi Ermak Bıdahmetuly,- «Aq tilekpen, Astana» shyǵarmashylyq jobasy álemdegi eń tabysty jáne damyp kele jatqan jas qalalardyń biri Astanamyzdy nasıhataýǵa arnalyp otyr. Jas Astananyń óneriniń qalaı damyp kele jatqandyǵyn biz osy Nevzorovtar otbasy atyndaǵy beıneleý óneri mýzeıinen tamashalaý múmkindigine ıe bolyp otyrmyz. Astana – zamanaýı sáýlet úlgisi ǵana emes, sonymen qatar únemi jańa ıdeıalar men izdený ústindegi jańashyl qala.
Kórmede Táýelsizdik saraıynyń qorynan qazaqstandyq sýretshilerdiń 100-ge jýyq jumystary usynyldy. Atap aıtqanda, A.Aqanaev, E.Aıtýarov, R.Kúlbatyrov, A.Smaǵulova, M.Bekeev, E.Sıdorkın, K.Kametov, E.Ospanuly, K.Mýllashev, M.Baıbosynov, О́.Tleýlıev, D.Makın, D.Núger jáne músinshiler Tohtar Ermekov pen Sembiǵalı Smaǵulovtyń jumystary qamtylypty.
– Bizdiń sharamyz mine, kórmeden bastaldy,-dedi Astana qalasy mádenıet jáne sport basqarmasy basshysynyń orynbasary Narıma Muhamedalına,-munda tek astanalyq qana emes, Qazaqstandyq sýretshilerdiń jumystary qamtylǵan. Semeı qalasynda Astana qalasynyń akademııalyq qazaq mýzykalyq orkestri jetekshileri Aıtqalı Jaıymovtyń basqarýynda ónerlerin kórsetýi biz úshin úlken maqtanysh.
Raýshan NUǴMANBEKOVA
Sýretti túsirgen avtor
SEMEI