Shóp býyny endi-endi qatyp keledi. Keń kósilgen Kókseńgirdiń dalasy, beridegi Toraıǵyr jaılaýy tunyp tur. Ásirese aǵash baýyryndaǵy jońyshqa kıizdeı tutasyp jatyr.
Erkekshóp, bıdaıyq, mııa, bozǵanaq, buıyrǵyn, bozjýsan, qońyrjýsan, jerjýsan, kókpek, balyqkóz, tuzjapyraq, ajyryq, qarashaǵyr, aq shaǵyr, qarǵatuıaq, qońyrbas, aqseleý deısiń be, bári bar. Keshegi keńes zamanynda saýyryna soqa tımegen jer qunary tym jaqsy.
Soltústik óńirde mal azyǵy óte mańyzdy. Osydan eki-úsh jyl buryn aqpan-qańtarda jaýyn jaýyp, jaıylymnyń bári aq qar, kók muz bolyp, malsaq qaýym júgen ustap qala jazdaǵan. Sol bir aýyr jyldardan sabaq alǵan mal baqqan jurt qazir jadyraǵan jaz aılarynda shamalary kelgenshe tyrbanyp, jem-shóp qoryn jasaýǵa barynsha yntaly. «K jáne Sharıpov» sharýa qojalyǵynyń 500 gektar shabyndyq alqaby eńbek dúbirine bólengen. Qazir munda shópshiler brıgadasy qaýyrt eńbek ústinde. Birneshe traktor qoıý ósken shópti shaýyp jatsa, kelesileri shóp degdip, kebisimen kók boıaýyn joımaı, tyrmalap jınap, teńdep jatyr.
– Bizdiń sharýa qojalyǵynda myńǵa jýyq qara mal bar, –deıdi sharýashylyq basshysy Quttymbet Sháripov, – shama kelse bıylǵydaı shóp jaqsy shyqqan kezde eki jyldyq qor jınap alýdy mejelep otyrmyz. Tabıǵattyń tartýyn elemeýdiń ózi kúná ǵoı. Jigitter jaqsy jumys istep jatyr. Ásirese, Tórebek Shárip, Qanaı Raqymjanovtar shabyndyqqa shalǵy salǵan jigitterge úlgi.
Bıylǵy jaz jaýyn-shashyndy. Qol bógeıtini de sol eken. Degenmen, ábjildik tanytqan azamattar alqaptaǵy shókken túıedeı teń-teń bolyp jatqan býylǵan shópti kidirtpeı qystaq basyna tasymaldaýda. Sabaqty ıne sátimen orylǵan kúnderi elý-alpys tonna shóp tasymaldanady. Shópshilerdiń tamaǵy tegin, maýsymdyq jumys kezinde eńbekaqylary 150 myń teńgeden aınalýda.
Soltústikte qym-qýyt naýqan bolyp esepteletin shóp daıyndaý endi bastaldy. Birer kúnnen soń Jókeıdiń jaǵasy, Bulandynyń buıyǵyp jatqan dalasy shalǵynyń syrylymen eńbek áýenine bólenetin bolady.
Baıqal BAIÁDIL,
«Egemen Qazaqstan»
Aqmola oblysy,
Birjan sal aýdany