Búginde Shymkent-Túrkistan arasyndaǵy kólik qatynasy jıilegen. Onyń basty bir sebebi - oblys ortalyǵyna qaraı memlekettik mekemeler kóshi bastaldy. Túrkistan oblysy boıynsha Shymkent qalasynda ornalasqan 30 aýmaqtyq memlekettik organ bar bolsa, kelesi aıdyń ishinde olardyń barlyǵy osynda Túrkistan qalasyna kóshpek. Al ákimdikke qarasty oblystyq 24 basqarma da kelesi aıda tolyǵymen kóship, jańa oblys ortalyǵynda óz jumystaryn bastaıtyn bolady.
Alǵashqylardyń biri bolyp Memlekettik kirister departamenti kóshti bastap, Túrkistan qalasynda Qarjy mınıstrligine qarasty aýmaqtyq organnyń ókildigin ashty. Ashylý saltanatynda Qarjy mınıstrliginiń jaýapty hatshysy B.Tortaev mınıstrliktiń oblystyq organdarynyń ókildiligiń jańa oblys ortalyǵynda ashýdyń negizgi maqsaty — memlekettik organdardy ǵımarattarmen qamtamasyz etý, ornalastyrý jáne kóship keletin qyzmetkerlerge áleýmettik jaǵdaı jasaýdy úılestirý jumystaryn júrgizý ekendigin atap ótti.
Aıta ketelik, Túrkistan qalasyna kóship baratyn memlekettik qyzmetkerdiń eńbek aqysyna 20 paıyz qosylyp, jumys kezeńi úshin tólenetin jyl saıynǵy eńbek demalysy kúntizbelik 30 kúnge qosymsha ekologııalyq kúntizbelik 7 kún merziminde saýyqtyrý demalysy beriletin bolady. Sondaı-aq, oblys ákimi J.Túımebaev oblys ortalyǵynyń Túrkistan qalasyna kóshirilýine baılanysty oblys ákimi apparaty men basqarmalardyń qyzmetkerlerimen kezdesýinde eńbek demalysyn berýmen birge jyl saıyn saýyqtyrýǵa arnalǵan tólemderdiń ústine bir aılyq kórsetkish kóleminde materıaldyq kómek beriletinin málim etti. Osylaısha memqyzmetker eńbek demalysy kezinde jalpy 3 materıaldyq aılyq aqy alatyn bolady. Budan bólek, oblys ákimi kóship baratyn qyzmetkerlerge jaldamaly ýaqytsha turatyn Túrkistan, Kentaý qalalarynan páterler men qonaq úılerdiń, jataqhanalardyń tizbesi anyqtalyp, jumystardyń jalǵasyp jatqandyǵyn aıtty. «Bul úılerdi jaldap turýda respýblıkalyq bıýdjetten ár qyzmetkerge aı saıyn 81 600 teńgeden járdemaqy beriledi. Sondaı-aq, kelisim shart negizde jumys isteıtin barlyq qyzmetkerler de jataqhanalarmen qamtylatyn bolady. Jáne Elbasynyń halyqqa úndeýiniń birinshi baǵyty «7-20-25» baǵdarlamasy aıasynda osy jyly Túrkistan qalasynda jeke salýshylar esebinen 6 kópqabatty turǵyn úı, ıaǵnı, 15,6 myń sharshy metr bolatyn 288 páterdiń qurylysy bastalǵan. 2019 jyly qurylysy bitip, paıdalanýǵa berýdi josparlap otyrmyz, sondyqtan da jas memlekettik qyzmetkerlerdi osy baǵdarlamaǵa qatysýǵa shaqyramyn»,- dedi J.Túımebaev.
О́ńir basshysynyń aıtýynsha, aldaǵy 1,5 jyl ishinde barlyq qyzmetkerler qyzmettik páterlermen qamtamasyz etiledi, al eńbek ótili 10 jyldan joǵary, menshiginde páter tirkelmegen jaǵdaıda, tıisti Erejege sáıkes qyzmetkerlerge qaldyq sommasymen qyzmettik páterlerdi jeke menshikke berý máselesi arnaıy komıssııada qarastyrylatyn bolady. Kelesi jyly memlekettik ákimshilik qyzmetshilerge eńbekaqy tóleý júıesine pılottyq rejım engizilmek. Iаǵnı jumys sapasy men nátıjesine qaraı qyzmetkerlerdiń aılyq jalaqysy 1,5 men 2,5 esege deıin kóteriledi.
Erkin DOSYMBAI,
Túrkistan oblysy