Astana qalasynyń 20 jyldyq mereıtoıy elimizdiń barlyq óńirinde joǵary deńgeıde atalyp ótti. Kún sanap qaryshtap damyp kele jatqan elorda eldigimizdiń aıǵaǵy, memlekettigimizdiń kórinisi ekeni anyq. Búgingi tańda bas qalaǵa qarap elimizdiń ózge oblystary men qalalary boı túzep keledi. Sondyqtan da aımaqtar úshin Astananyń alatyn orny erekshe.
Aıtýly mereıtoıǵa oraı Jambyl oblysynda Astana kúnderi ótti. Osyǵan oraı Áýlıeata óńirine Astana qalasynan qala ákiminiń orynbasary Ermek Amanshaev bastaǵan arnaıy delegasııa kelip, jambyldyqtarmen júzdesti. Áýeli elordalyq delegasııa birqatar óndiris oryndaryn aralap, óńirdiń ekonomıkalyq-áleýmettik damýyn oń baǵalap, ózderiniń pikirlerin bildirdi.
Budan keıin olar M.H.Dýlatı atyndaǵy Taraz memlekettik ýnıversıtetinde ótken «Aımaqaralyq yntymaqtastyq bıznes-forýmyna» qatysty. Munda óz salalary boıynsha tájirıbe almasty. Jıyndy ashyp, júrgizip otyrǵan Jambyl oblysy ákiminiń orynbasary Erqanat Manjýov Astana barlyq óńirdiń, sonymen qatar árbir qazaqstandyqtyń maqtanyshy ekenin aıtyp ótti. Sondaı-aq ol Áýlıeata óńirindegi Astana kúnderi aıasynda uıymdastyrylǵan bul bıznes-kezdesý ózara yntymaqtastyqty damytýǵa jáne tájirıbe almasýǵa taptyrmas múmkindik ekenin jetkizdi.
О́z sózinde Astana qalasy ákiminiń orynbasary Ermek Amanshaev tarıhy tereń Taraz jeriniń, áleýeti artqan Áýlıeata óńiriniń qonaqjaılylyǵyna rızashylyǵyn bildirdi. Sonymen qatar Astana qalasynyń álem shaharlary arasyndaǵy abyroıy men bedelin qalyptastyrýdaǵy Elbasynyń eren eńbegin atap ótip, bas qalanyń gúldenýi jolynda Jambyl oblysynyń da úlesi mol ekenin aıtty. «Bul kezdesý aımaqtardyń arasyndaǵy saýda-ekonomıkalyq qarym-qatynastardyń odan ári damýyna serpin beredi» dep atap ótti Ermek Ámirhanuly.
Kezdesý barysynda Astana qalalyq ınvestısııa jáne kásipkerlikti damytý basqarmasy basshysynyń orynbasary Erlan Bekmurzaev, «Astana» ÁKK» UK» aksıonerlik qoǵamy tóraǵasynyń orynbasary Dosbol Kúsherbaev, «Astana Innovations» AQ basqarma tóraǵasynyń orynbasary Serik Qusaıynov, «Smartnet» jeke kásipkerliginiń dırektory Taır Qojahmetov jáne «Led Solıýshn» jaýapkershiligi shekteýli seriktestiginiń dırektory Qanybek Aıtaqov sóz alyp, Astana qalasynda atqarylyp jatqan keleli jobalar men jarqyn isterge toqtaldy. Sondaı-aq búginde damýdyń dańǵyl jolyna túsken Taraz qalasynda da túrli ıgi jobalardy birlese atqarýǵa nıet bildirdi. Atalǵan forým aıasynda qos taraptyń ókilderi arasynda yntymaqtastyq jónindegi memorandýmǵa qol qoıyldy.
Budan keıin astanalyq delegasııanyń qatysýymen oblystyq ólketaný mýzeıinde «Aq tilekpen, Astana!» atty kórmeniń ashylý saltanaty ótti. Munda qonaqtar Astananyń jáne Áýlıeatanyń tarıhyna qatysty dúnıelerdi tamashalady. Bas qalanyń baıtaq mereıtoıyna oraı Jambyl oblysyndaǵy Astana kúnderi aıasynda «Balasaǵun» ortalyq konsert zalynda Astana qalasy ákimdiginiń Memlekettik akademııalyq fılarmonııasy áýlıeatalyq kópshilikke «Astanadan aq tilek...» atty konserttik baǵdarlamasyn usyndy. Konsert barysynda Astana qalasy fılarmonııasynyń «Shalqyma» bı ansambli, Estrada bı ansambli, Qazaq orkestrimen qatar, Gúlmıra Aqúrpekova, Klara Tólenbaeva, Almas Kishkenbaev syndy tanymal ánshiler óner kórsetti.
Hamıt ESAMAN, «Egemen Qazaqstan»