Almatynyń «Qaırat» klýby Eýropa lıgasy ekinshi irikteý kezeńi aıasynda Nıderlandynyń azýly klýby AZ (Alkmaar) komandasyn qabyldap, 2:0 esebimen basym tústi.
Almatynyń «Ortalyq» stadıonynda ótken matchtyń alǵashqy mınýttan-aq AZ komandasy qaýipti shabýylmen kózge túse bastady. Degenmen kezdesýdiń 12-mınýtynda almatylyq klýbtyń jartylaı qorǵaýshysy Aderınsola Eseola mergendigimen kózge túsip, komandasyn esepte alǵa shyǵardy. Gol soǵylǵan soń oıyn máneri qyza tústi. Eki komanda da alma-kezek shabýyldaǵanymen, birinshi taımda esep ózgermedi.
Kezdesýdiń ekinshi bóligin «Qaırat» belsendi bastady. Oıynnyń 50-mınýtynda Aderınsola Eseola esepti eselep, óziniń matchtaǵy ekinshi golyn saldy. Oıynnyń qalǵan bóliginde «Qaırat» qorǵanysqa kóbirek kóńil bólip, esepti ustap turýǵa tyrysty. AZ komandasy esepti qysqartýǵa qansha tyrysqanymen, «Qaırat» komandasyna gol soǵý olarǵa buıyrmady.
Eki komanda arasyndaǵy qarymta kezdesý 2 tamyz kúni Nıderlandyda ótedi.