Qostanaıdyń «Tobyl» klýby Eýropa lıgasy ekinshi irikteý kezeńi aıasynda Armenııanyń «Pıýnık» komandasyn qabyldap, 2:1 esebimen basym tústi.
Qostanaıda ótken kezdesýde úsh gol soǵylǵanymen, komandalar alǵashqy taımynda bir-biriniń qaqpa kiltin taba almady. Al ekinshi taımnyń 49-mınýtynda jastar ulttyq quramasy men «Tobyl» klýbynyń 22 jastaǵy jartylaı qorǵaýshysy Maksım Fedın esepti ashty. Match aıaqtalýyna 10 mınýt qalǵanda komanda kapıtany Azat Nurǵalıev oıyndaǵy ekinshi goldy salyp, esepti 2:0-ge jetkizdi.
Degenmen, «Tobyl» klýby match sońyna deıin eseptegi basymdyqty saqtap qala almady. 90-mınýtta Armenııa quramasynyń shabýylshysy Rýslan Korıan esepti qysqartyp, qarymta oıyn aldynda komandasyna úmit otyn syılady. Endi eki ujym 2 tamyz kúni Armenııada kezdesedi.