Taıaýda Astanada dástúrli túrde uıymdastyrylatyn «Qazaqstannyń úzdik taýarlary» baıqaý-kórmesi ótti.
Baıqaýǵa elordalyq 72 kompanııa qatysyp, olardyń ishinde «О́ndiristik maqsattaǵy úzdik taýarlar» atalymy boıynsha 22 kompanııa, «Halyqqa arnalǵan úzdik taýar» atalymy boıynsha 36 kompanııa, «Úzdik azyq-túlik taýar» atalymy boıynsha 14 kompanııa ózara baq synasty. Otandyq taýar óndirýshilerdiń ishinde úzdigin anyqtaý úshin Astana qalasynyń kásipkerler palatasy, Astana qalasy qoǵamdyq densaýlyqty qorǵaý departamenti, Ulttyq saraptaý men sertıfıkattaý jáne sanıtarııalyq-epıdemıologııalyq saraptama ortalyqtarynyń bilikti mamandarynan quralǵan komıssııa jumys istedi. Sharany uıymdastyrýdaǵy negizgi maqsat – otandyq taýar óndirýshileriniń ózara tájirıbe almasyp, básekege qabilettiligin shyńdaýǵa yqpal etý.
Astana qalasy óńirlik kásipkerler palatasynyń dırektory Alen Túlkibaevtyń aıtýynsha, atalǵan sharanyń jyldan-jylǵa mańyzdylyǵy artyp keledi. Osyndaı kórme-baıqaýlar uıymdastyrý halyq arasynda otandyq ónimderge suranystyń artýyna oń yqpal etpek. Baıqaý qorytyndysy boıynsha 9 kásiporyn úzdik dep tanylyp, dıplom jáne baǵaly syılyqtarmen marapattaldy. Olardyń arasynda azyq-túlik óndiretin, qurylys zattaryn shyǵaratyn jáne IT taýarlardy naryqqa usynatyn seriktestikter bar. Elordalyq kásiporyndardyń tutynýshylar suranysyn óteýge qabileti de, áleýeti de jetkilikti. Bas qaladaǵy kásiporyndar taýarlarǵa degen tapsyrystyń 40 prosentin ótep otyr.
Búginde Qazaqstannyń 12 óńirinde «Qazaqstannyń úzdik taýary» óńirlik kórme-baıqaýynyń qorytyndysy jarııalanyp, 108 jeńimpaz anyqtalǵan. Atalǵan shara aldaǵy ýaqytta elimizdiń qalǵan óńirlerinde jalǵasyn tappaq. Ár óńirden top jarǵan úzdik kásiporyndar kúzde ótetin «Qazaqstannyń úzdik taýary» respýblıkalyq kórme-baıqaýynda ózara baq synasatyn bolady.
Erkejan AITQAZY,
«Egemen Qazaqstan»