Murat Saǵyndyqov – 25 jasta. Ata-anasymen jáne eki baýyrymen 7 jyl buryn О́zbekstannan kóship kelgen. Tashkenttegi ataqty fızıka-matematıka mektebin úzdik bitirgen talantty túlek tarıhı otanynda ómir jolyn eńbekten bastaýdy jón sanapty. Áýeli úlken qaladaǵy «Bedobaı» atty túrik dámhanasyna ydys-aıaq jýýshy bolyp jumysqa ornalasady. Sóıtip júrip túrik ashanasynyń dónershi kásibin jedeldetip meńgerip alady.
Búginde Almatyda bir kúnde 200-ge deıin dóner-káýap jasaıtyn maqtaýly maman. Árıne kelýshiler sany qubylyp turatyny bar.
– Tús mezgilinen tún aýǵansha ystyq lep urǵan elektr peshtiń túbinde turyp dám daıarlaý ońaı emes. Biraq etim úırendi, – deıdi keıipkerimiz kúlimsirep.
Qatyrma nanǵa sıyr eti men taýyq etin, basqa da on-san túrli dámdeýish qosyp 3-5 mınýtta daıyn bolǵan dóner-káýapty tutynýshyǵa usyna qoıý kerek. Eńbekke bala kezden etene jaqyn Muratqa munyń qıyndyǵy joq.
Alaýlaǵan jasqa qatar-qurbylary sekildi keshkisin ásem Almatynyń demalys oryndaryn qydyrýǵa ýaqyt tapshy. Dámhananyń ózi de qalanyń qaq ortasynda, keshkisin kelýshiler kóbeıip ketedi. Qoly-qolyna juqpaı dóner-káýap jasap berýshi jigit árbir jannyń jyly sózinen, iltıpatynan qanattanady.
Aptasyna bir-aq kún demalady. Aılyǵy orta eseppen 200 myń teńge. Qala mańyndaǵy Úshqońyr aýylynan qatynaıdy. Murattyń sheberligine tánti bolǵan qaladaǵy birqatar dámhanalar usynys jasaǵan. Bas tartty. Janyna jaqyn ári jańa kásipke demeýshi bolǵan «Bedobaı» dámhanasyn qımady.
Murattyń kópten bergi armany – álemde ornyn tapqan túriktiń dóner-káýaby stılindegi qazaq tamaǵyn ómirge ákelý.
«Bolashaqty josparlaý ózim úzdik oqyǵan fızmat mektebinen jáne ata-anamnyń tárbıesinen qalyptasqan ǵoı» degen senimdi jastyń jigeri men talabyna súısinip, sáttilik tiledik.
Talǵat SÚIINBAI,
«Egemen Qazaqstan»
Almaty